«Өөрднр» ашлгч ик хәләврт орлцх

06-05-2023, 10:10 | Общество


НТВ телеканалын «Страна талантов» гидг соңсхврт «Өөрднр» бииһин шаңһа театрин коллектив орлцад, билг-эрдмин эн марһанд нүүрт һарад, суперфиналд орлцх зөв авв.

НТВ телеканалд һардг «Страна талантов» гидг соңсхвриг Хальмгин телехәләһәчнр ик оньгтаһар хәләв. Мөрн сарин 29-д «Өөрднр» бииһин театрин белдсн «Хуучн зург» би үзүлв. РСФСРин билг-эрдмин ачта үүлдәч Петр Надбитовин һардврт коллектив тиигәд хальмг бииһин эрдмәрн жюрин гешүдиг, олн хәләһәчнриг йир икәр соньмсулад, өөдәнәр үнлгдв.
«Хуучн зург» әмдрәд олн хәләһәчнрин оньгт сүркә хальмг би зөргтә болн ик билгтә әмтнә бииһин эрдмиг үзүлв. Хуучн зургас һарч ирсн метәр хальмг биичнрин дөңгәр мана өвкнрин тууҗ дәкнәс тодлулгдҗ, давсн болн өдгә цагиг негдүлв. Балетмейстер Владимир Надбитов тәвсн би тиигҗ цагин залһлдан болҗ, дөрвн зун җил хооран Әрәсән өмн үзгин меҗәд ирҗ, бат шивә болҗ зогссн зөргтә хальмгудын тууҗиг сергәв.
Ода деерән Цугәрәсән эн марһана йилһгч девсңгүд болҗана. Иим нег девсңднь «Өөрднр» бииһин театр нүүрт һарад, 100 миңһн арслң шүүҗ авв. Ут тоодан нәәмн тиим девсң болхмн. Амтнь диилвр бәрсн коллектив нег сай арслңга мөрәһәр ачлгдхмн.
Марһана жюрид нертә артистнр болн эрдмчнр орҗана: «Русская песня» гидг театрин художественн һардач Надежда Бабкина, «Поедем, поедим» гидг телесоңсхврин һардач Федерико Арнальди, Әрәсән ачта артист, нертә хореограф, билгтә биич Егор Дружинин, эстрадн дууч Ярослав Сумишевский мөн.
Келхәс, жюрин гешүн Федерико Арнальди Хальмг театрин би икәр таасад, теднә төлә дууһан өгв. Дәкәд болхла, аштнь олн хәләһәчнрин ик зунь дууһан өгәд «Өөрднр» дииләчнр болхла, Федерико бийән бәрҗ чадлго хальмг артистнр тал гүүһәд, тедниг йөрәһәд, ик гидгәр байрлв.
Өвкнрин үлдәсн бииһин зөөриг цааранднь цагин йовудла ирлцүлҗ, сән кевәр делгрүлҗ йовх коллективин күцәмҗиг үнләд, «Хальмг үннә» умшачнр нертә эн коллективд улм өөдән күцәмҗ дурдҗана.

ҖИРҺЛИН Кермн

Видео