Тутрһин зүүтə хотар гиичнрəн тоов

25-04-2023, 09:00 | Общество



Бемб өдрлə бамб цецгин наадм Октябрьск района Ик Царң поселкд болв. Урднь эн наадмин йовудт Октябрьск район Баһ Дөрвдə районла хамцу керг-үүлдвр давулдг билə. Эн җил болхла Ик Царңд түрүн болҗ хаврин байр давулгдв.

Арвн негн часла «Юность» нертə сойлын-спортивн комплекст шидр олн-əмтн хурв. Сойлын Герин хаҗуд Җаңһр баатрмудтаһан үзгдв. Күңкəн Алтн Чееҗ, Гүзəн Гүмб, Күнд һарта Савр, Догшн Хар Санл, Орчлңгин сəəхн Мингиян эдн тəəз деер һарч тал дунднь суув. Концертиг һардҗ давулсн Санл Шабгуров баатр болһна тускар тодрхаһар келв. Күңкəн Алтн Чееҗин дүриг үзүлсн М.В.Хониновин нертə Ик Царңга 2-ч тойгта дунд сурһулин һардач Эрднь Канкаев сəəхн йөрəл тəвҗ керг-үүлдвриг эклв.
Бамб цецгин наадмд ирсн гиичнриг Октябрьск района муниципальн бүрдəцин толһач Басң Убушаев йөрəлин үгəр тосв. Энүнə келсəр, Октябрьск района һазрт эн керг-үүлдвр түрүн болҗ давҗана, тегəд цуһар байрта бəəв. Нəəрт орлцхар Əəдрхнə мүҗин Черноярск районас делегац ирсиг медүлв, тер мет нег һазра улсан хаврин байрла йөрəҗ, цаһан хаалһ дурдв.
Өрəл җил хооран Октябрьск района 45 җилин өөнин байрт орлцсн билəвидн. Тана сойлын коллективс үзүлсн билгэрдм маднд өврмҗ болв, гиҗ Черноярск района толһач Сергей Никулин темдглв.
Байрин концертд «Миңһн байр», «Теегин герл», «Степная Русь», «Харада» болн Октябрьск района сойлын талдан коллективс билг-эрдмəн үзүлв.
Бамб цецгин наадмин йовудт РисФест нертə һоллгч керг-үүлдвр давв. Энүнд района СМО-син болн Ик Царнга бүрдəцсин көдлəчнр шунмһаһар орлцв. Марһанд орлцхин төлə тутрһар олн зүсн хот белдх кергтə болв. Узбек улсин плов, японцнр эдлдг роллы, тутрһта һуйрар болһсн олн зүсн кегдлмүд, нань чигн хот района бүрдəцст көдлҗəдг мергҗлтнр белдв. Орлцач болһн даавртаһар белдҗ, хотан үзүлсн саамд шүлгүд айслулҗ умшв болн дууһар дахулв. РисФест марһана ашар Ик Царңга 1-ч тойгта дунд сурһуль диилвр бəрв. Хойрдгч ормиг «Айс» нертə бичкдүдин сад эзлв, һурвдгч ормнь «Герл» нертə бичкдүдин садын көдлəчнрт өггдв. Диилəчнр мөңгнə мөрəсəр ачлгдв. Тер мет байрин йовудт бөкнр, харвачнр чидлəн сөрв.
Үдин хөөн байрин концертын хойрдгч əңгнь болв. Энүнə эклцəр Октябрьск РМО-н болн Əəдрхнə мүҗин Черноярск района хойр толһачнр экономическ болн сойлын халхар нөкцлтхəр үгцҗ, бəрмт цааснд һаран тəвв.
Гиичнрин делегацин ханьд ирсн «Черноярские станичники» хазгудын дууна ансамбль болн «Ассорти» нертə бичкдүдин коллектив билг-эрдмəрн байрлулв. Тер мет дууна болн бииһин «Бамб цецг» хальмг шаңһа академическ ансамблин концерт кен-негнднь сергмҗ үүдəв.

КАРСАНА Евгения

Видео