Санлынь тевчв

11-05-2023, 09:05 | Общество


Хөн сарин 9-д Хальмг Таңһчин һардврин, зөв-йос харлһна органмудын, баһчудын бүрдәцсин элчнр болн ветеранмуд Элст балһсна «Мөңк һалд» ирҗ, өвкнрин туурмҗиг тодлҗ, гүрмр цецгүд тәвҗ санлынь тевчв.

Таңһчин Толһач Хаска Батун темдглсәр, Алдр Диилврт Хальмгин элчнр цуг орн-нутгин улсла хамдан ик тәвцән орулв. Хальмг теегин хөрн дөрвн үрнд Советин Союзин Баатрин нерн зүүлһгдсиг онц темдглв. Терүнәс нань дөрвн миңһн һар күн орден-медальмүдәр ачлгдсн болдг, гиҗ Бату Сергеевич тодлулв.
Тер мет Төрскән харсгч Алдр дәәнә ветеран, «Әәдрхн-Кизләр» хаалһин тосхлтд орлцсн Сарң Мукаева йөрәл келҗ, нег һазра улстан дууһан нерәдв.
Онц темдглхд, Диилврин ончта Өдрлә Төрскән харсгч Алдр дәәнә ветеран Петр Леонтьев Москва балһснд Улан Талвңд Диилврин парадт орлцв. Келхәс, Петр Леонтьевич 1945-ч җилин тууҗлгч парадт орлцсмн. Ветеран дәкн нег иим парадт орлцх күслтә бәәсмн. Тегәд далн нәәмн җил давад, эн ончта йовдлд орлцҗасндан ик байрта бәәхән медүлв. Диилврин парад төгсснә хөөн Петр Леонтьев орн-нутгин талдан ветеранмудла харһҗ, теднлә болн волонтермудла хамдан цаган сергмҗтәһәр давулв.

ОЛЬДАН Цаһан

Видео