Хаалһин эдл-ахун төрмүдәр күүндв

11-05-2023, 09:25 | Общество



Хальмгин регион заллһна төв (ЦУР) таңһчд дааврта үүл дааҗах улсла харһлт бүрдәлһн сән авъяст тохрв. Одахн Хальмгин ЦУР-ин һардач Аралтан Бамбышев таңһчин тосхлтын, көлгн-күчнә болн хаалһин эдл-ахун министрин үүлиг дав зуур дааҗах Юрий Ользеевла, тосхлтын министерствин әңгин ахлач Киштя Мелентьевала, онц арһлач Михаил Богатовла «шуд эфирт» харһлт бүрдәҗ давулв. Керг-үүлдврин йовудт хаалһин эдл-ахун делгрлтин туск төрәр күүндвр болв.

Харһлтын йовудт Юрий Ользеев тосхлтын, көлгн-күчнә болн хаалһин эдл-ахун халхиг ясруллһна төрмүдин, кеҗ-күцәҗәх көдлмшин болн зурасин тускар келҗ өгв. Гер тосхлһнд хүв тәвц мөңгән орулҗ меклгдсн улсин зөвинь харсҗ, эднә неквринь күцәлһнә туст ик көдлмш кегдв. Эднә шунмһа орлцлһтаһар таңһчин Толһачин, Залврин, тер мет Залврин Ахлачин дарук Нарн Кюкеевин, тосхлтын министерствин нилчәр чинвртә төр хаһлгдв. Элст балһснд Клыковин нертә уульнцар удан цагт эс тосхгдҗасн 92 «а» тойгта олн давхр гер эдлврт орулгдхмн.
Ямаран чигн регионд хаалһин төр хамгин һоллгч төр болна. Нег үлү мана таңһчд эн төр ик чинр зүүҗәнә. Тер юңгад гихлә мана һазрт аэропорт ода көдлҗәхш, тер мет төмр хаалһар поезд мана һазрар давҗ һархш. Тегәд зуг автомобильн хаалһс олзлгдна. Мана һазрт 1216 дууна региональн хаалһс, 833 дууна федеральн хаалһс, 3300 дууна бәәрн хаалһс эдлврт бәәнә. Эн цуг хаалһсиг нормативн некврлә ирлцдгиг теткх, тер мет ясврин көдлмш кех зөвтә.
Әрәсән һардвр цаглань хаалһин бәәдлинь ясруллһна, чинринь өөдлүллһнә, әмтнә төлә әәмшг уга болн таалмҗта кец-таал тогталһна, шин хаалһс тосхлһна кергүдт оньган өгчәнә. Тер төләд «Әәмшг уга, сән чинртә хаалһс» гидг келн-улсин төсв батлгдсн болдг. 2019-ч җиләс авн эн төсв орн-нутгин цуг регионмудт, тер мет Хальмг Таңһчд бәәдлҗирһлд тохрагдҗана. Эн төсв күцәлһнә йовудт мана таңһчд 476 дуунад региональн хаалһс, 140 дуунад бәәрн хаалһс ясгдв.
Хотл балһсн Элстд, тер мет райодт, Садовое, Яшалта, Ик Буурл, Яшкуль селәдт, Городовиковск, Лагань балһсдт үүлдҗәдг предприятьмүд таңһчд хаалһс ясврин көдлмш кехмн. Эннь цугтаднь олзта-туста болҗана. Шин көдлмшч ормс бүрдәгднә, алв таңһчин бюджетд орна. Хаалһ тосхлһна эдл-ахуст 700 шаху күн көдлҗәнә. Эдн цаглань му биш җалван авна. Тегәд чигн кесг улс эн халхд көдлҗ, өрк-бүлән асрҗана.
2023-ч җилд ирлцңгү төсвин йовудт кех-күцәх керг-үүлдврмүд зуралсмн. Тер тоод 12 региональн хаалһс, 17 бәәрн хаалһ ясхмн. Хаалһсиг ясҗ, нормативн некврмүдлә ирлцх бәәдл тогтахмн, тер мет хаалһсин сән чинртә бәәдлинь хадһлхар зүткҗ, эн туст җолачнрас чикәр олзлхиг некҗ, эн туст бүртклһн кегдхмн.
«Шуд эфирт» болҗасн керг-үүлдврин йовудт әмтн сурврмуд өгәд бәәв. Элст-Арзгир-Кавминводы хоорндк хаалһ яслһна тускар кесг күн сурв. Эн хаалһин бәәдл әмтиг үүмүлҗәхнь медгдҗәнә. Тер юңгад гихлә эн хаалһар Кавминводы балһснд бәәх аэропортур йовх кергтә болна. Тер мет кесг улс Ар Кавказин эмнлһнә санаторьмудт одҗ, эрүл-мендән батрулна. Кесгнь тиигәрән өрк-бүләрн амрхар одна. Эн җил эн хаалһиг арһлач Михаил Богатовин бүрдәц ясхмн. Хаалһиг бат кевәр ясҗ, көдлмшән темдглсн болзгт дуусхвидн гиҗ Михаил Богатов иткүлв.

АРЗАН Маргарита

Видео