Өрк-бүләрн чик авг-бәрцәр бәәнә

11-05-2023, 09:30 | Общество


Целинн района Троицкое селәнд бәәдг Бадмин Алексей чик авг-бәрцәр бәәдг, цогц-махмудан батрулад спортар соньмсдг күн гиҗ тоолгдна. Дәкәд Алексей Гонкаевич олн җилдән эврә сән дурар цусан өгч, күнд гемтә улст дөңгән күргҗ Әрәсән ачта донорин нер зүүҗәх күн болна. Энүг дахад авальнь, эгчнь болн көвүнь бас цусан өгдг болсмн.

Түрүн болҗ эн әәрмд церглҗәсн цагтан цусан өгсн билә. Хамдан церглҗәсн салдсмуд зеткртә йовдлд тусад, шав авсна хөөн теднд цусн кергтә болв. Тегәд көвүд эврә дурар цусан өгч, үүрмүдиннь әм аврсмн. Хөөннь Хальмг ик сурһульд сурчасн цагтан баахн Алексей бас цусан өгдг болв. Тиигәд баһ цагтан әмтнд дөң болхин төлә буйнч седклтә кергт орлцдг болад, насн-җирһлиннь туршарт эн цусан өгчәнә. Алексей Гонкаевичин келсәр, одахн эн тәвн дәкҗ цусан өгсн болв. Бадмин Алексей һучн шаху җилдән Целинн района алвна цергллтд көдлв, тенд бас үүрмүдтән үлгүр болҗ йовла. Ода эн района суңһврин комиссь толһална, көдләчнр дунд чик авг-бәрц батрулхар шунна.
- Цусан өгдг күн чик авг-бәрцәр бәәх зөвтә. Хойр сар болад би цусан өгнәв, болв зәрмдән мадниг дуудад, күнд гемтә күүнд дөң кергтә гиҗ җиңнүлнә. Тегәд мел белн бәәх кергтә болна. Би өдр болһн цогц-махмудан батрулнав. Дәкәд бидн цөөкн мал, така гертән бәрнәвидн, тегәд өрүн эртәс теднд хотынь өгәд, хаша-хаацинь ахулснь бас туслна. Киитн ус бий деерән асхнавидн, үвлд үүрмүдтәһән һолын уснд бас булхнавидн. Цусан өгдг улст шимтә хот-хол эдлх кергтә, тегәд давста, өөктә хотас саглнав. Тегәд хая нег царцнав, эрүл-мендм бат болна, – гиҗ Алексей Гонкаевич келнә.
Цусан өгснә хөөн цогц-махмуднь батрад, насарн баһрсн болҗ медгднә гиҗ эн темдглнә. Олн җилдән цусан өгчәх залу элгн-садндан үлгүр болсмн. Энүг дахад авальнь Кермн Эрдниевна болн эгчнь Ольга Гонкаевна бас эн кергт орлцдг болв, күүкд улс удл уга Әрәсән ачта донорин нер зүүхмн. Валерий көвүнь бас эднә зергләнд орв. Эцкән дахад көвүнь чик авг-бәрцәр бәәнә, эрүл-мендән дару-дарунь шинҗлнә.
Тиигәд, герин эзнә үлгүрәр Бадмаевихнә бүлд цуһар чик авг-бәрцәр бәәнә. Цогц-махмудан батрулҗ, шимтә эдлууш олзлҗ, олн зүсн гемәс саглҗ киитн ус бий деерән асхдг төләдән эдн ямаран чигн эм уухш, царцҗ гемнхш. Дәкәд эднә тоолврар, әмтнлә ниитә бәәҗ, үлү үзлго, бәәсәрн байн болҗ бәәхмн, тер цагт эрүл-менд бас бат болхнь лавта.

ДООҖАН Наталья
ЗУРГТ: Бадмин Алексей үвләр киитн ус бий деерән асхна

Видео