Ээҗин келән дастн!

13-05-2023, 09:20 | Общество


Авъяст тохрсар җилд хойр дәкҗ барт бичгдлһнә дааврта кем болна. Мөрн сарин 1-әс авн эн җилин хойрдгч өрәлд газет авхин төлә барт бичгдлһн эклв. Төрскн келәр һардг «Хальмг үнн» газетин умшачнр дунд олн җилдән дурта һарциг бичүлҗ авчах итклтә үүрмүд олн бәәнә.

Тедн дунд мана таңһчд күндтә, тоомсрта, ик ачта улс баһ биш бәәхнь бахмҗта болна. Шидр нертә җаңһрч, Әрәсән бичәчнрин ниицәнә гешүн, Моңһл орн-нутгин «Алтн һасн» орденәр ачлгдсн Окна Цаһан Зам «Хальмг үнн» газетиг дөңнҗ, таңһчин әмтнд дуудвр кев.
- Эврә төрскн келән дастн, «Хальмг үнн» газетән дөңнҗ бичүлҗ автн. Нааран нүүҗ ирәд, Әрәсән ханьд орснас авн ода күртл бидн тууҗан мартад угавидн, өвкнриннь сойл, авъяс болн кел хадһлҗ йовнавидн. Маднд алдр дуулвр «Җаңһр», болн нань чигн амн үгин байн зөөр бәәнә. Дорас өсч йовх үйнрт ээҗин эңкр келән хадһлхин, төрскн келәрн күүндҗ хальмг нерән дуудулхин төлә «Хальмг үнн» газетән бичүлҗ авх кергтә. Хальмг келн – уурхан саң болна, тегәд күн болһн терүг хадһлх күслтә болх зөвтә, – гиҗ Окна Цаһан Зам келв.

БАТАН Сәәхлә

Видео