Әрәсән җисәнд шунмһаһар орлцҗана

13-05-2023, 09:45 | Общество


Хальмг Таңһчин кесг сурһульмуд «Орлята России» гидг федеральн төсвд шунмһа кевәр орлцҗана. Эклц классин сурһульчнрин социальн шунлтыг өөдлүлхин төлә иим төсв бүрдәгдв. Эврә Төрскндән итклтә, уралһ седклтә, медрлән гүүдүлх болн спортын күцәмҗән икдүлх седклтә бичкдүдиг сурһмҗлх күслтә эн төсв күцәгдҗәнә.

Бичкдүд бәәтхә, теднә багшнр, эк-эцкнр, ах классмудын сурһульчнр-сурһмҗлгчнр эн төсвд орлцна. Хамдан үүдәгч кевәр көдләд олн зүсн көтлвр күцәҗ хамцу кевәр күслдән күрдг ховр дамшлтыг хоршана. Нег багин ханьд орад эдн цугтан бат кевәр үүрлнә.
Әрәсәд «Орлята России» гидг төсв 2021-гч җиләс авн эклҗ күцәгдҗәнә. Ода түүнә ханьд 60 миңһн класс, тер тоод Әрәсән орн-нутгтин кемҗәнд орсн шин регионмудын 101 команд үүлдҗәнә. Тиим кевәр үүрмүдтәһән хамдан диилвр бәрхәр зүткнә, багшнр болхла эрдмин мергҗлтән өөдлүлнә. Цуг эднд бидн күцәмҗ дурдҗанавидн.
Ода «Орлята России» төсвин эн җилин көтлвр төгсҗ йовна, тер тоод мана таңһчин цуг сурһульмудын эклц классмудын багмуд «Орлята России» җисәнә төвд тооцаһан өгәд сурһулин җилән төгсәҗ йовна. Тер тоод академик Пүрвә Эрдниевин нертә Элстин 23-ч тойгта сурһулин 4-ч «в» классин бичкдүд көтлврт орлцад нүүрлгч орм эзлхәр зуралҗана. Эднә күцәсн үүлдврин тускар классин һардач Виктория Дженджиева келв: «Сурһулин җилин эклцәр маднд эн җисәнд орлцх селвг өглә. Җилин эргцд онц янзта долан көтлврт орлцх кергтә бәәсмн. Цугтаднь бидн орлцҗ чадсн угавидн, болв бичкдүд тиим керг-үүлдврәр икәр соньмсв. Болв багш күн эднә көтлврч болх зөвтә.
Түрүн девсңгнь «Орленок-Лидер» гиҗ нерәдгдв. Цуг мана көвүд-күүкд эн керг-үүлдврт орлцв. Түрүләд бидн таньлдуллһна кичәл давулвидн. Нүүрләч, доброволец, эколог гисн кен болҗахинь цәәлһҗ өгвидн, яһад гихлә тиим көтлврт бидн орлцх зөвтә биләвидн. Дәкәд мана классин сурһульчнр олн зүсн кергт дөң болдг, түүнд шунлттаһар орлцдг волонтермудла (6-7-ч классин сурһульчнр) харһла, теднд нерәдсн кесг кичәл давулвидн, тедн көдлмшин тускар соньн кесг тоот медҗ авла. Дәкәд эврән мана бичкдүд волонтермуд болад бичкдүдин садт концерт бүрдәв. Хаалһар йовдг зокалыг күцәлһнә төрәр бичкн наад тәвләвидн.
Тер мет экологин халхар олн зүсн мергҗлтлә таньлдвидн, йиртмҗ харлһна тускар соньн кесг тоотыг экологин төвин элч маднд келҗ өглә. Мөрн сард бидн «Орленок – төрскнч седклтә күн» гидг девсңд орлцлавидн. Келн-улсин музейд одад тенд кесг соньн тоот һәәхләвидн, дәәч үүлдвр күцәҗ йовсн ветеранмудла харһлавидн.
Мини классин сурһульчнр бичкдүдин билг-эрдмин сурһульд, амн үгин зөөрин багд орна. Цуг көтлвриг бидн урдаснь темдгләд авчклавидн. Бидн көгшд асргддг Герт хальмг олн улсин ду-бииһин концерт үзүлләвидн.
Бичкдүдин болн баһчудын Әрәсән җисән ашлвр кеҗ, мана көдлмшиг үнлх, тегәд мана олна үүлдвр бас ик чинр зүүҗәнә. Түрүләд муниципалитетин кемҗәнд эн мана көдлмшин ашнь диглгдх, дәкәд таңһчин болн орн-нутгин кемҗәнд йилһән сән коллективс йилһгдх гиҗ би санҗанав.
Хамгин шунлтта бичкдүд «Орленок» лагерьт одх, тенд кергтә тоотыг дасад, цааранднь эн җисәнд орлцх.
Цааранднь ах болн дундын классмудт эдн харһлтс, керг-үүлдврмүд эврән бүрдәх, тер хургудт шунлттаһар орлцх. Багшин төлә шишлң һарцс тогтагдсн бәәнә. Тер ик керг-үүлдврт ямаран белдвр кеҗ яһҗ орлцхин тускар тенд келгдҗәнә. Көтлврт белдхин төлә 8-9 кичәл күцәх кергтә. Түүнд бичкдүд орлцҗ медрлән, эв-дован гүүдүлҗ, шунлтан, олна хәләцән делгрүлх. «Орлята России» гидг җисән эклц классмудас эклнә. Мана таңһчин кесг сурһульмуд энүнд орлцҗана.
Бәәдл җирһлд бийән яһҗ бәрхин, ямаран эрдм шүүҗ авхин төлә «Орлята России» җисән сән медрл өгнә. Бидн зуг 4-ч классас авн эн җисәнд орлцдг болвидн. 3-ч класст бидн РДШ җисәнд орлцлавидн. Түүнә кемҗәнд «Экин-ээҗин төлә тәвсн наадн» гидг марһанд бидн орлцлавидн. Болв тер цагт әәмшгтә гем түгҗәлә. Бидн наадан тәвәд, видеозурган Интернетәр йовулад, сертификат авлавидн. Тиим шунлтта бичкдүд манад өсчәнә», гиҗ классин һардач товчлв.

ТҮРВӘН Һуна

Видео