Музейд сөөһәр иртн

16-05-2023, 09:20 | Общество


Н. Пальмовин нертә Келн-улсин музейд “Ночь музеев – 2023” гидг Цугәрәсән ик керг-үүлдврт белдҗәнә.Музеймүдин нарт-делкән өдрин хөөн авъяс болсн эн керг-үүлдвр күцәгджәнә. Эн җил музейд әмтн сөөһәр ирдг цагнь хөн сарин 20-д бембә өдр нарн өдрт орсн кемлә болхмн.

Эн җил музеймүдт сөөһәр “Тууҗ болн тууҗс” гидг нертә олн керг-үүлдврт орлцҗ цаган соньнар давулхмн. Әмтн 18 часла ирәд, 22 час күртл тааста нег төрт оньган өгч чадҗана. Ирсн улсин оньгт ветеранмудын дууна коллективин концерт үзүлгдхмн. Баһ наста билгтнрлә чигн харһҗ болх арһ бас учрҗана. Мастер-классмудт орлцҗ, әмтн ямр нег эрдмәр дасмҗ авн гиҗәнә. Буйнч үүлдврт орлцх саната улс чигн эн өдр СВО-д церглҗ йовх баһчудт дөң болҗ чадхмн.
Келн-улсин музейд эн сө ирсн әмтн хальмг кезәнк оршаврмудын нуувч тууҗла таньлдхмн. Хальмг хан болһна намтрла таньлдх таал бас бәәнә. Хальмгуд кезәнә нүүҗ йовсн, бәәршлҗәсн һазрла музейин көдләчнр хәләһәчнриг таньлдухмн. Хальмг ишкә герт орад, Петр хан болн Аюка хан харһсн тууҗиг соңсхд ямаран соньн болх.
Онлайн-викторинд орлцад, ирсн әмтн көгҗмлә болн дүрслүлгч билг-эрдмин шин болн соньн олн тоотла таньлдҗ чадҗана. Дәкәд нег ончта йовдл – ирсн күн болһнд зурачнр зург зурҗ чадхмн. Тиигчкәд кезәңк ямаран нег цагин бәәдлд зурган зурулҗ болхмн. П.Чонкушовин нертә билг-эрдмин колледжин оютнр тер зургудыг зурхмн.
Буйнч кергин цаг гидг кергүүлвдрт орлцсн әмтн медицинск түрүн дөң күргдгиг, зер-зевәс халхлдг гөлм өлгдгиг, цергчнрт дөң болх нань чигн тоот кедгиг дасч авхмн. Дәкәд болхла цергчнрт бичгүд бичҗ болхмн. Цуг тер тоот диглгдәд, цергин һазрур йовулгдхмн.
Музейин көдләчнрт эн керг-үүлдвр күцәлһнд волонтермуд, П. Чонкушовин нертә билг-эрдмин колледжин оютнр болн Элст балһсна, Целинн района нань чигн бүрдәцс дөң болҗана. Музейд сөөһәр ирәд, сергмҗтәһәр амрад, буйнч керг-үүлдврт орлцтн.

ҖИРҺЛИН Кермн

Видео