Цаһан Амна бичкдүд ончрв

16-05-2023, 09:30 | Общество


Одахн, хөн сарин 10-д, Элстд «Хальмг Таңһч» гидг зәңгллһнә агентствин герт «Әрәсән инженерин кадрмуд - 2023» («ИКаР») гидг иргч эрдмән шүүҗ авлһна Цугәрәсән марһана дииләчнрин болн эднә сурһмҗлачнрин брифинг болв. Бичкдүдин багин һардач, Үстин района Цаһан Амн селәнә 2-ч тойгта сурһулин эклц классин багш Татьяна Чензеева болн марһанд орлцачин экнь Эльзата Натырова, багин элч, 1-ч классин сурһульч Элина Чензеева седкүлчнрин сурврт хәрү өгв. Цугәрәсән марһан Москва балһснд, Сколково инновацин төвин ул деер болв. Тер мет эднлә хамдан марһана йовудт орлцҗасн болн ик дөңгән күргҗәсн «Бичкн Эйнштейнмүд» гидг клубин элчнр Баина Кекеева болн Камила Убушаева брифингд орлцв.

- Сколково төсвд болсн марһанд Хальмг Таңһчиг һурвн баг элчлҗәлә. «Икаренок» гидг әңгд сурһульд ордго бичкдүд – «Бичкн Эйнштейнмүд» клубин «Хамдан» баг орлцв. Эдн бөөрг кедг цехин көдлмшт дөң болдг эварһ үүдәсмн. Түүнә төлә «Йилһән сән көтлврин код» гидг номинацд диилвр бәрв, – гиҗ күүндвриг Баина Владимировна эклв.
Тиим марһан җил болһн бүрдәгднә, бичкдүд эртәс дурта эрдмән шүүҗ автха гиһәд эн керг-үүлдвр күцәгднә гиҗ клубин багш темдглв. Бичкдүд төсвән күцәхин төлә бөөрг кедг цехд одад, тер кегдлмүд яһҗ белддгинь хәләв.
Цугәрәсән марһанд орхин өмн хальмг бичкдүд таңһчин «Робофест – Создаем будущее-2023» гидг 6-ч наадмд медрлән сөрж үзсмн. Тиим керг-үүлдвриг «Бичкн Эйнштейнмүд» гидг клуб җил болһн бүрдәнә. «Нааран таңһчин райодас болн Әрәсән регионмудас күүкд ирҗ мергҗлтән үзүлнә, нег-негнләрн таньлдна. Тиим наадм билгтә бичкдүдиг йилһҗ авхд дөң болна», – гиҗ Цаһан Амна сурһулин багш Татьяна Чензеева цәәлһврән өгв.
«Бидн бас тиим керг-үүлдврт орлцхар шиидүвидн. Тегәд аштнь эн җил нам диилвр бәрүвидн, мадниг Күндллһнә һашгар, үнтә белгәр, кубкар ачлв. Аштнь бидн Москвад, Сколково төвд болсн Цугәрәсән марһанд орлцх зөв аввидн», – гиҗ Татьяна Исатаевна цааранднь темдглв.
«Тенд мана күүкд төсвән йир сәәнәр харсҗ чадв, бүкл Хальмг Таңһчин авъясиг болн сойлыг үзүлв, аштнь Цугәрәсән марһана дииләчнр болв. Бидн «Бичкн Эйнштейнмүд» клубд, «Профессориум» гидг иргчин академьд ханлтан өргҗәнәвидн», – гиҗ Цаһан Амна багш тоолвран келв.
Хойр өдрин марһан Хөн сарин 4-5-д Москвад болв. Цаһан Амна «Өөрд күүкд» гидг багин ханьд негдгч классин сурһульчнр Екатерина Даваева болн Элина Чензеева орв. Эдн цуг әңгд орлцад диилвр бәрж һоллгч кубокар ачлгдв.
Тер мет «Дамшлтарн хувалцлһн» гидг номинацд дамшулач болн багш Татьяна Чензеева Сколково төвд мастер-класс үзүләд, тавн нүүрлгч багшнрин тоод орад, финалистин сертификат авла.
«Тиим мана диилврт ик тәвцән орулсн «Бичкн Эйнштейнмүдт» болн Цаһан Амн селәнә 2-ч тойгта сурһульд, селәнә СМО-н һардврт, Үстин района толһачд, Үстин района больницин көдләчнрт ханлтан өргжәнәв», – гиҗ Татьяна Чензеева онц темдглв. Яһад гихлә эн бүрдәцс келн-улсин хувц-хунр болн һәәхүлин стендмүд хулдҗ авхд дөң болв.
Педагогин халхар чигн Татьяна Исатаевна ик дамшлт хоршав, зарһч болад кесг шин тоот дасв. «Цаһан Амн селәнәс ирсн бичкн күүкд түрүн болҗ Москва балһс үзв, тенд ик күцәмҗд күрв, Пермь, Томск, Хабаровск балһсдын күүкдлә таньлдв, тенд техникин үүдәлт ик делгрлт авсн бәәнә. Мана сурһуль техникин кергсләр баһ тетквртә, болв бидн арһ-чидлән үзүләд дииләчнр болувидн. Тиим йовдл бичкдүдт ик урмд өгв», – гиҗ Цаһан Амна 2-ч тойгта сурһулин багш келв.
Дәкәд эврәннь төсвин тускар 1-ч классин сурһульч Элина Чензеева келҗ өгв. Эднә үүдәсн фермд олнд туста эрдмтә улс көдлнә – малын эмч, адуч. Эднә көдлмшиг ах үкрч Баатр һардна. Эврә төсвәрн бичкдүд фермд кедг көдлмшиг гиигрүлхәр седҗәнә гиҗ Элина цәәлһв.
Диилвр бәрсндән, тиим ик кемҗәтә марһанд орлцсндан ик байрта бәәхән күүкн бас келв. Эдн талдан региона көвүд-күүкдлә соньн белгүдәрн сольлцв. Цуг орлцачнр мана таңһчин элчнрлә зурган цокж авв- гиҗ күүкн бахмҗарн хувалцв.
- Мини тавта көвүн «Бичкн Эйнштейнмүд» клубд нидн жиләс авн орна. Кесг соньн, шин юм медҗ-дасҗ авв. Көвүм Цугәрәсән ик чинртә марһанд орлцад ирв. Эдн медрлән үзмҗтә кевәр гүүдүлж, авг-бәрцән батрулад, диилвр бәрдгиг дасҗ авна. Омг авч олн зүсн марһаст орлцад бәәх кергтә, тиим селвгән эк-эцкнрт өгхәр седләв, –гиҗ Эльзата Натырова келв.
Тиим кевәр таңһчин бичкдүд Цугәрәсән марһаст күцәмҗ бәрхдән белн бәәнә, эднд зуг сән дамшлта багшнрин болн эк-эцкнрин дөң кергтә.

ТҮРВӘН Һуна

Видео