Манҗин Аркадь болн театр

16-05-2023, 09:35 | Общество

Басңга Баатрин нертә Келн-улсин театрт Хальмгин баатр, нертә көгҗмч Манҗин Аркадин санлд нерәдсн асхн болв. «Аркадий Манджиев болн театр» гисн нертәһәр болсн керг-үүлдврт таңһчин театрмуд орлцҗ, Манҗин Аркадин көгҗминь бичсн нааддын зәрм әңгсинь үзүлв.

Хальмгин нер туурсн көгҗмч олн-зүсн халхсар көгҗм бичсинь концертин көтлвр медүлв. «Акума», «Манҗихнә бер» («Невеста из Манджикин»), «Стая», «Шууган хальмг хотнд» («Переполох в калмыцком хотоне»), «Потерянное – рядом», «Про Федота-стрельца», «Эңкр манахс» («Родные наши»), «Я – Будда» гидг олн нааднд бичгдсн көгҗм дәкнәс әмтнә чикнә хуҗр хаңһаҗ эн асхн күңкнв.
Ямаран олн янзар эн наадд тәвгдсинь хәләһәчнр тодлна. Янз болһнд ирлцәтә көгҗм бичнә гисн амр төр биш. Мана Аркадий болхла, наадна учр-утхинь медҗ авад, һол халхинь медүлсн көгҗм бичсинь Виктор Хаптаханов, Санҗ Пурсяков, нань чигн артистнр болн үүлдәчнр тоолврарн хувалцв. Көгҗмнь түрүн нүүрт йовдг дөрвн мюзикл хамдан бичснә тускар Виктор Хаптаханов тодлҗ келнә. «Акума», «Стая» гидг нааднд баһчуд дунд тааслт олдг өдгә цага янзта көгҗм орсмн. «Про Федота стрельца» гидг нааднд көгҗм тас талдан болх зөвтәһинь медҗ Аркадий айсмудыг янзлулсн болҗана. Шаҗна халхар тәвгдсн «Я – Будда» гидг нааднд көгҗм ямаран болсиг көгҗмчнр болн театрин шалһачнр зөвтәһәр үнлнә.
Наадна һарц болһниг билгтин көгҗм йилһән сәәнәр медүлҗ, учр-утхинь дахулҗ, улм медгдм болхднь туслсн деерән айсин эврә чинрәр нааднд орулсинь артистнр эврә наадндан үзүлҗ чадв. Цуглрсн әмтн болхла Манҗин Аркадин көгҗм ямаран олн халхта бәәсинь, наадна һарцсиг хәләҗәһәд дәкн медв. Нааднд орсн ду болһниг чигн тодлҗ, мартад угаһан ирсн олн хәләһәчнр медүлв.
Нер туурсн көгҗмч, олна үүлдәч Манҗин Аркадий сәәһән хәәһәд җил болҗана. Болв төрскнч седклтә, көгҗмин айсар дүүрң седклтә келн-улсин сойлыг, көгҗмиг делгрүлхәр цуцрлтан уга үүлдҗ йовсн Манҗин Аркадь үүрмүд дундан, хальмгуд дундан угальгдад бәәнә. Делкән ик аһуд Хальмгм минь эврә өвәрцәрн, билгин зөөрәрн даңгин нер һарад йовх гисн күслтәһәр шунҗ йовсн Манҗин Аркадин көгҗм оньдин маднла хамдан, мөңкинд хальмг улсин зөөр болҗ үлдв. Энүнә үүдәсн еңсг айста дуд мадниг дахҗ, амр биш тоотыг диилҗ һарад, уралан зүткхмн гисн ицг өгчәнә.

ҖИРҺЛИН Кермн

Видео