Тохма малын һәәхүлд

18-05-2023, 09:05 | Общество


Эн өдрмүдт Дагестан Республикин Каспийск балһснд түрүн болҗ тохма хөөдин болн ямадын XXIII-ч Цугәрәсән һәәхүл давҗана. Әрәсән селәнә эдл-ахун министерствин мергҗлтнр, орн-нутгин регионмудын АПК-н заллтын элчнр, КФХсин болн ЛПХ-син һардачнр эн керг-үүлдврт орлцҗана. Һәәхүлиг Әрәсән селәнә эдлахун министерств, Дагестан Республикин Залвр болн хөд өсклһнә Келн-улсин ниицән бүрдәсн болдг. Тиигәрән орн-нутгин 25 регионас, тер тоод Хальмг Таңһчас бас, Белоруссин элчнр чигн ирв.

Цугәрәсән һәәхүлин йовудт кесг конференц, мастер-класс, «төгрг ширәс», харһлтс давулгдхмн. Келхд, эн керг-үүлдвр Каспийск балһсна «Анжи-арена» нертә стадиона талвңд бүрдәгдв. Тохма мал өсклһнд өдгә цагин некврлә ирлцҗәдг эв-арһ олзлад, ямаран шинрлтс орулгдҗахин тускар һәәхүлин йовудт келгдҗәнә. Каспийск балһснур селәнә эдл-ахун халхар үүлддг номтнр, нертә үүлдәчнр болн нань чигн улс ирсмн.
Хальмг Таңһчин делегацин ханьд селәнә эдл-ахун министерствин һардврин, таңһчин АПК-н зәңгллһнә цергллтин, Б.Б.Городовиковин нертә Хальмг ик сурһулин ул деер үүлдҗәдг селәнә эдл-ахун малыг һарһдг региональн номин Төвин элчнр болн Хальмгин нүүрлгч арвн эдл-ахус орв.
Һәәхүлд олн зүсн тохма хөд болн ямад үзүлгдҗәнә. Тедн дунд эдильбаевск, карачаевск, андийск, дагестанск, хальмг, грозненск болн талдан нань чигн тохм мөн.
Терүнәс нань орн-нутгин зурһан региона элчнр эврәннь сойлын коллективсин орлцлһтаһар билг-эрдмән, авъясан үзүлхмн.
Цугәрәсән һәәхүлин ашнь маңһдур, хөн сарин 19-д, диглгдхмн. Энүнә тускар тодрхаһар цааранднь зәңглхвидн.

КАРСАНА Евгения
Зургудт: Һәәхүлд орлцҗадг «Улан Хөөч» эдл-ахун элчнр; дамшлтта зоотехникч Үлмҗин Церн

Тохма малын һәәхүлд

Видео