Цергчнриг дөңнх саң

18-05-2023, 09:15 | Общество


Әрәсән Президент Владимир Путинә даалһврар мана орн-нутгт «Төрскән харсачнр» гидг саң бүрдәгдв. Эн саң шишлң цергә керг-үүлдврт орлцачнриг болн ветеранмудыг дөңнҗ, медицинск болн социальн реабилитацин, эмәр, техническ эв-арһсар тетклһнә, психологическ дөң күрглһнә болн санаторн-курортн эмнлһнә төрмүд хаһлдг болхмн.

Шидр Москва балһснд РАНХиГС-ин улд эн саңгин региональн әңгүдин һардачнрин төлә семинар-селвлцән болв. Терүнд федеральн министерствсин, «Төрскән харсачнр» гидг саңгин төв аппаратын көдләчнр, региональн әңгүдин һардачнр, Әрәсән субъектсин ведомствс хоорндк комиссьмүдин ахлачнр орлцв. Хальмг Таңһчин Залврин Ахлачин дарук– таңһчин социальн делгрлтин, күч-көлснә болн көдлмшәр тетклһнә министр Өлзәтин Марина бас семинар-селвлцәнд орлцад, саңгин үүлдвр бүрдәлһнә туст босхгдсн төрмүдәр соньмсв.
Энүнә йовудт социальн зүүцүләчнрин көдлмш бүрдәлһнә, СВО-д орлцачнриг болн әмнәсн хаһцсн цергчнрин өрк-бүлмүдиг дөңнлһнә көдлмш бүрдәлһнә тускар өргн күүндвр болв. Семинарин сүл өдртнь саңгин региональн әңгүдиг хөн сарин 30-31-д секлһнә төр хәләгдв. Әрәсән Залврин Ахлачин дарук Татьяна Голикова, «Төрскән харсачнр» гидг саңгин ахлач Анна Цивилева болн эн академин һардачин үүл дааҗадг Алексей Комиссаров семинарт орлцачнрт хамцу үүлдвр туста болтха гиҗ дурдв.
- Өргн болн дааврта көдлмшиг хамдан күцәх кергтә. Ветеранмудт дөң күргдг иим бүрдәц түрүн болҗ Әрәсәд экләд үүлдҗәнә. Регионмудын әңгүдин үүлдвр чик кевәр бүрдәгдхлә кесг күүнә җирһл ясрхнь лавта, - гиҗ Әрәсән Залврин Ахлачин дарук Татьяна Голикова семинарт орлцачнрт келв.

БАТАН Сәәхлә

Видео