Көтчнрәс хойр өрк-бүл ончрв

18-05-2023, 09:20 | Общество


Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, «Җилин сән гисн өрк-бүл» гидг Цугәрәсән марһана региональн девсңгин аш диглгдв.

Марһана жюрин шиидврәр Көтчнрә района Шемнр селәнд бәәдг Олег болн Деляш Болдановихн диилвр бәрв. Герин эзн олн җилин туршарт селәнә эдл-ахун халхд көдлҗәнә, эндр эн эврә крестьянск-фермерск эдлахуд мал асрҗана. Авальнь селәнә сойлын Герт көдлнә. Эдн Булгун күүктә болн Санан көвүтә, хойр зеетә болн нег ачта аав-ээҗ болна. Болдановихнә өрк-бүл нег һазра улс дунд күндтә, тоомсрта, буйнч седклтә улс болна. Тегәд көтчнрәхн эднә байриг хувалцҗ ик күцәмҗ дурдҗана.
Марһана ашар номинац болһнд дииләчнр йилһрв. Тиигәд, Целинн района элчнр Чингиз болн Раиса Боктаевихн олн үртә өрк-бүлмүд дунд диилвр бәрв. Эдн тавн үртә: Ангелина, Эвелина, Милана, Богдан болн Саян эк-эцкдән өлзәтә сән үрд болҗ өсчәнә. Баахн эк эцк хойр күүкдтән чик сурһмҗ өгч, өвкнриннь авъяс болн сойл күндлҗ, авг-бәрцәрн үлгүр болхар зүткнә. Селән һазрт бәәдг өрк-бүлмүд дунд Виктор болн Замира Манджиевихн нүүрт һарв, эдн Көтчнрә района Ергенинский селәнә бәәрн улс болна. Эднә өркбүлд хальмг улсин авъяс, сойл болн төрскн кел хадһллһн һол чинр зүүнә. Элст балһснд бәәдг Роман болн Булган Баташовихн баахн өрк-бүлмүдин номинацд ончрв. Баһчуд һурвн күүк өскчәнә, ду-биид дурта, билгтә улс болҗ олн дунд нер һарна.
Номинац болһнд диилвр бәрсн өрк-бүл 50 миңһн арслңга мөрәһәр ачлгдхмн. Һол мөрә шүүсн Болдановихн болхла деернь 100 миңһн арслң авхмн. Дәкәд өрк-бүл болһнд диплом болн үнтә белг бәрүлҗ өггдхмн. Региональн девсңд диилвр бәрсн өрк-бүлмүдт ачлвр бәрүлҗ өглһнә байрин хург хөн сарин 24-д болхмн гиҗ зуралгдҗана.
- Министерствин болн эврәннь нерн деерәс «Җилин сән гисн өркбүл» гидг Цугәрәсән марһана региональн девсңд орлцсн өрк-бүлмүдиг йөрәҗәнәв. Эн марһан давулгддг болад бидн мана таңһчин сән гисн өрк-бүлмүдин тускар медҗ, эднә ач-тусиг темдглнәвидн. Эн марһанд диилвр бәрсн өрк-бүл болһн таңһчин бәәтхә, федеральн девсңд шин күцәмҗ бәртхә, - гиҗ Хальмг Таңһчин Залврин Ахлачин дарук– таңһчин социальн делгрлтин, күч-көлснә болн көдлмшәр тетклһнә министр Өлзәтин Марина келв.
Эн марһан җирһлин күнд бәәдлд туссн бичкдүдиг дөңнлһнә саңгин седвәрәр, Әрәсән күч-көлснә министерствин дөңгәр 2016-ч җиләс авн давулгдҗана. Өрк-бүлин чинр болн эк-эцкин даавр өөдлүллһн марһана һол күсл болжана. Темдглхәс, Хальмг Таңһчин өрк-бүлмүд җил болһн федеральн девсңд марһана дииләчнр болж һарна. Эн җил чигн мана элчнр билг-эрдмән үзүлҗ, өрк-бүлиннь тускар олнд медүлҗ диилвр бәрх гисн ицл бәәнә.

ДООҖАН Наталья
ЗУРГТ: Көтчнрә района Шемнр селәнд бәәдг өнр-өсклң Болдановихн

Видео