КТК шишлң көлг белглв

20-05-2023, 09:05 | Общество

Урҗ өдр Элстд КТК-Р таңһчин социальн болн жилищнкоммунальн эдл-ахун бүрдәцст шишлң көлгнә-күчнә түлкүр бәрүлҗ өгв. Эн байрта йовдл Хальмг Таңһч болн «КТК-Р» АО-н хоорнд батлгдсн бооцана йовудт учрв. Компань 2022-ч җилд күцәгдсн буйнч седклин көтлврин керг-үүлдврмүд ашлҗ шишлң техник йилһҗ өгв. Хальмг Таңһчин Залврин Ахлач Босхмҗин Гилән, «КТК-Р» АО-н Әрәсән Залврла залһлда бәрлһнә төрәр үүлддг һардачин дарук Михаил Гришанков байрин кергүүлдврт орлцв.

Нидн мөрн сарин 19-д Хар Һазра района Комсомольск селәнд Хальмг Таңһчин Толһач Хаска Бату болн «КТК-Р» АО-н һардач Николай Горбань тавн җилә нөкцлтин болн хамцу үүлдврин туск бооцанд һаран тәвсн билә. 2022-ч җилд Консорциум мана таңһчд социальн төсвс күцәлһнд 100 сай арслң һарһв. Тиигәд, эн мөңгн олн җилин эргцд күцәгдҗәх «КТК – 1-ч класст орҗах сурһульчнрт», «Төрскн һазр-уснаннь йиртмҗ хадһлый» гидг төсвс күцәлһнд, олн үртә болн гемтә-шалтгта бичкдүдт Шин җилин белгүд бәрүлҗ өглһнд болн «Өөрднр» гидг бииһин театрт 59 ормта автобус хулдҗ авлһнд һарһгдв. Сән авъяст тохрсар КТК гемтә-шалтгта улсиг, җирһлин күнд таалд туссн бичкдүдиг дөңнҗ, социальн бүрдәцсиг шишлң кергсләр болн көлгн-күчәр теткнә. Буйнч седклин көтлврин медлд гемтә-шалтгта улсин Гер-интернат ГАЗель Next тамһта автобуста болн Лада Largus тамһта гиигн машитә болв. Бичкдүдин социальн хорһдл болн психоневрологическ интернат бас Лада Largus тамһта машиһәр теткгдв. Ик Буурла района «Ик Буурла РМО-н Сельдорсервис» болн Хар Һазра «Коммунальн сервис» гидг муниципальн бүрдәцст хаалһ цеврлдг шишлң көлгн-күчн йилһгдв.
- Цуг нарт-делкәд болн мана орннутгт нәрн бәәдл тогтсн болв чигн КТК-Р бий деерән авсн даавран күцәҗ, мана таңһчд буйнч седклин көтлврин медлд эрүл-менд харлһна, баһчудын, социальн теткврин, спортын болн сурһуль-эрдмин бүрдәцсиг шишлң көлгәр болн кергсләр теткнә. Консорциум мана таңһчд алвна мөңгән орулдг, инвестиционн керг күцәдг социальн дааврта компань болҗ үүлднә. Эндр бәрүлҗ өггдҗәх шишлң көлгиг мана райодт күләҗәнә, юңгад гихлә эдн үвлднь хаалһсиг цаснас цеврлҗ әәмшг уга бәәдл теткхмн. Социальн бүрдәцст мөч-тату, гемтә-шалтгта улсиг шишлң керсгләр өргҗ зөөхин төлә таал тогтагдхнь эднд өөдән чинртә туслмҗ күргхд туслхмн. КТК-н һардврт бидн ик ханлт өргҗәнәвидн, мана нөкцлт делгрәд йовтха, - гиҗ Гилән Герасимовна келв.
«КТК-Р» АО-н Әрәсән залврла залһлда бәрлһнә төрәр һардачин дарук Михаил Гришанков социальн болн жилищн-коммунальн эдл-ахун бүрдәцсин һардачнрт шишлң көлгнә түлкүр бәрүлҗ өгәд, буйнч седклин көтлвр цааранднь күцәгдх гиҗ темдглв. Гемтә-шалтгта болн медәтә улсин Элстин гер-интернатын һардач Каманҗан Александр, «Ик Буурла РМО-н «Сельдорсервис» бүрдәцин һардач Авалдыка Эрднь болн Хар Һазра «Коммунальн сервис» гидг муниципальн бүрдәцин һардач Туһульчан Саглр КТК-Р компаньд болн таңһчин залврт ханлтын үг келв.

ДООҖАН Наталья
ЗУРГТ: шишлң көлгнә түлкүр бәрүлҗ өглһнә керг-үүлдврт орлцачнр

Видео