Тууҗиг тодлулсн дун

20-05-2023, 10:20 | Общество

Хальмг Таңһчин ачта артистк Бембин Гилән дуулсн дуд кен-негнднь седклин сергмҗ болҗ йовхинь келәд керг уга. Театрин тәәз деер тогтасн дүрмүдәрнь чигн олн хәләһәчнр эн билгтә артисткиг меднә. Шидр Бембин Гилән “Привет, Андрей” гидг соңсхврт орлцв.

Андрей Малаховин телеһарцсиг орн-нутгин, тер дотр мана таңһчин әмтн дурлҗ хәләнә. Эврә цагтан олн дунд тааслт олҗ йовсн дуудыг, дуучнрин неринь чигн сергәҗәдг һарцс әмтиг соньмсулна. Давсн зун җилин найдгч җилмүдт нер һарч йовсн “Чингисхан” гидг дууна багин тускар дарани соңсхврт келгдв. ФРГ-д тогтсн дууна багд билгтә дуучнр болн көгҗмчнр хамцсн билә. Көгҗмд болн дуунд шин айсмуд орулҗ, көгҗмин соньн зевсгүд дахулҗ, дууг биилә негдүлсн түргн авцта көгҗмин эклц орулснь олн улст, нег үлү баһчудт икәр таасгдсмн. Өвәрц юмн. Эн багин дуд болн көгҗмин нәәрүллһс Германьд бәәтхә цуг делкәһәр тарҗ, концертст, нәәрт эркн биш соңсгдҗ йовсмн.
Цагин хурдн гүүдлд дууна шин багмуд үүдсн бийнь тер “Чингисхан” гидг дууна багин дуд ода күртл мартгдад уга. Шин үйин баһчуд тер дуунд оньган өгчәнә. Хальмг дууч Бембин Гилән дууг эврә янзар орс келнд буулһҗ дуулх седкл зүүһәд, өмнән тәвсн төрән күцәв. Чиңһс хаана зөргтә үүлдвриг тодлулгч түргн авцта болн сергмҗтә дун ик соньмслт үүдәнә
Хальмг Таңһчин ачта артистк Бембин Гилән дуулсн дун телесоңсхврт цуглрсн улст йир таасгдв. Ик экранд нертә баг яһҗ дуулҗахнь үзүлгдҗ, студьт болхла цуглрсн улст мана дууч халуч өргмҗтә бәәдләрн, дууна сергмҗтә айсин омгарн дахҗ биилх сана зүүлһв. Кесгнь хальмг дуучиг дахҗ дуулад, зөвәр сүркә бәәдл тогтав.

ҖИРҺЛИН Кермн

Видео