Зүркнь – хальмг һазрт

20-05-2023, 10:35 | Общество

Җил хооран хөн сарин 16-д Хальмгин Баатр, Хальмг Таңһчин билг-эрдмин ачта үүлдәч, Әрәсән көгҗмчнрин ниицәнә гешүн, моңһл көгҗмчнрин нарт-делкән Ассоциацин президент Манҗин Аркадий сәәһән хәәв. Өрк-бүлнь болн үүрмүднь Аркадий Наминовичин санлд нерәдҗ «Мини зүркн – хальмг һазрт» гидг концерт бүрдәв. Манҗин Аркадин үүдәлтд дурта улс «Ойрат-арена» гидг спортивн бәәшңд болсн концертд орлцҗ, нертә көгҗмчин санл тевчв.

Санлын концертыг ахнь Манҗин Борис секәд, залд цуглрсн цуг улст зүркни ханлтан өргҗ, күсдундур часин алднд билетмүдыг әмтн хулдҗ авснь Манҗин Аркадин дуд күн болһна седклд ончта орман эзлҗәхиг медүлв гив.
- Бүкл җилдән бидн мана Аркадь уга бәәввидн. Сәәһән хәәсн бийнь күчтә зөөр маднд үлдәв. Көгҗм тасршго, намаг уга болв чигн мини дуд үлдх, шин көгҗмчнр ирх гиҗ келдг билә. Мана орн-нутгт болн таңһчд иим билгтә үрд һардг учрар бидн хөвтә улс болнавидн. Мана Аркадин санл тевчҗ әрүнәр хадһлҗадг цуг таанрт бидн ик ханлтта бәәнәвидн, - гиҗ Борис Наминович келв.
Басңга Баатрин нертә Келн-улсин театрин артистнр «Сән байнуу» гидг дууһар концертыг секв. Хальмг Таңһчин симфоническ оркестр дахад Хальмгин нертә дуучнр Татьяна Чиктеева, Анна Очкаева, Лиҗ Гаряев, Кутлан Мукубенов, Инесса Месхишвили, Мазан Поштаров, Гилән Бембеева көгҗмчин дуд дуулв, билг-эрдмин сурһульмудын бичкдүд бас концертд орлцв. Элст балһсна медәтнрин болн гемтә-шалтгта улсин Гер-интернатд бәәдг Валерий Чекушенков «Манҗин Аркадин дуд» гидг түрүн марһанд дәәләчнрин тоод орсн билә, тегәд эн концертд орлцснь бас үзмҗтә болв. Залд цуглрсн улс артистнриг дахҗ дуулад, дун болһниг бүләнәр тосв. Концертын йовудт Манҗин Аркадийин концертсин тасрхас болн интервью үзүлгдв. Тиигәд, хальмг олн әмтнә шүлгч Шугран Вера Манҗин Аркадьла хамдан зәрм дууна тууҗинь келҗ, хамдан тедниг яһҗ үүдәснә тускар цәәлһснь олнд соньн болв. Ахнь Борис Наминович дүүһиннь туск тодлврмударн хувалцв, Эрднь дүнь болхла «Ээҗ» гидг ду дуулхла эднә эк-эцкин болн һурвн көвүнә бичкндк цага зургуд үзүлгдв.
Җил болһн хөн сард Манҗин Аркадин нертә нарт-делкән наадм давулхла сән болхмн гиҗ Манҗин Борис седвәр татв. Концертд ирсн улс терүг дөңнҗ, альхан ташв. Манҗин Аркадь төрскн һазртан бәәтхә, цуг Әрәсәд болн нарт-делкәд эврәннь үүдәлтәрн нер һарч йовсмн. Энүнә седвәрәр «Пентатоника» гидг өдгә цага көгҗмин нарт делкән наадм бүрдәгдҗ, Әрәсән, Моңһлын болн Китдин көгҗмчнриг хамцулсмн. Аркадий Наминович сойлын халхар олн зүсн төсвд орлцҗ, ах-дү болсн Моңһлын болн Китдин һазрт билг-эрдмәрн ик холд туурсмн. Концертд Дагестана олн-әмтнә артист Мухтар Нухов орлцҗ, хальмг келәр «Насндан чамдан» гидг ду дуулснь Аркадий Наминовичин билг-эрдм олн-әмтнә иньгллтиг батрулҗахиг ил үзүлв.
Концертыг ашлҗ артистнр һартан зул бәрҗ «Мини һазр» гидг ду дуулхла, залд цуглрсн улс ормасн босҗ эднлә хамдан дуулад дууч болн көгҗмч Манҗин Аркадин санлынь тевчв.

ДООҖАН Наталья
ЗУРГТ: «Манҗин Аркадин дуд» гидг түрүн марһана дииләчин негнь Валерий Чекушенков концертд орлцҗах кем

Видео