Һәәхүлин дииләчиг йөрәв

23-05-2023, 09:05 | Общество

Тохма хөөдин болн ямадын Цугәрәсән XXIII һәәхүлд Хар Һазра «Первомайский» СПК диилвр бәрв гисн зәңг намаг өврүлсн уга. Хальмг Таңһчин элчнр һәәхүлин һоллгч белгинь уданд авад уга билә. Зуг эн җилд ончрад, мана хальмг малын махн хамгин сән, шимтә болҗахиг дәкнәс батлвидн, гиҗ келәд таңһчин Толһач Хаска Бату «Первомайский» СПК-н һардач Валерий Болдыревиг йөрәв.

Һәәхүлд 80 һар эдл-аху, тер тоод таңһчин арвн эдл-аху бас орлцв. «Первомайский» СПК таңһчин нүүрлгч эдл-ахусин тоод ордгинь цуһар меднә. Мана таңһчин элчнр алтн 14 медаль авч ирв. Эннь орн-нутгт хөд өсклһнә кергт сән темдг болҗахинь герчлҗәнә. Эн туст таңһчд инвестиц орулҗ болна. Мал өсклһнә халхар көдлҗәдг улс Валерий Астаевичәс эрк биш үлгүр авх зөвтә. Мал асрхла, амн тоста! – гиҗ Бату Сергеевич темдглв.

ОЛЬДАН Цаһан

Видео