Һол белгнь Хальмг Таңһчд ирв

23-05-2023, 09:10 | Общество

Хөн сарин 16-ас авн 19 күртл Дагестан Республикин Каспийск балһснд тохма хөөдин болн ямадын Цугәрәсән XXIII һәәхүл болв. Энүг Әрәсән селәнә эдл-ахун Министерств, Келн-улсин хөөчнрин ниицән болн Дагестан Республикин селәнә эдл-ахун болн хулд-гүүлгәнә министерств бүрдәв.

Цугәрәсән һәәхүлин йовудт кесг конференц, мастер-класс, «төгрг ширәс», харһлтс давулгдв. Келхд, эн керг-үүлдвр Каспийск балһсна «Анжи-арена» нертә стадиона талвңд бүрдәгдв. Тохма мал өсклһнд өдгә цагин некврлә ирлцҗәдг эв-арһ олзлад, ямаран шинрлтс орулгдҗахин тускар һәәхүлин йовудт келгдв.
Һәәхүлин ашинь һарһҗах өдрт Хальмг Таңһчин Залврин һардач Босхмҗин Гилән ирв (зургт). Гилән Герасимовна таңһчин Толһач Хаска Батун нерн деерәс халун менд илгәҗ, керг-үүлдврин бүрдәһәчнрт, нег үлү Дагестан Республикин Залврин һардач Абдулмуслим Абдулмуслимовд ханлтан өргв.
Хар Һазра района «Первомайский» СПК ПЗ, Ю. Гагаринә нертә СПК, «Черноземельский» АО ПЗ, Яшкулин района «Улан хөөч» АО ПЗ, «Кировский» НАО, «28-ч Әәрмин нертә» АО, Приютна района «Агрофирма «Пик Плюс» ООО, Көтчнрә района «Сарпа» АО ПЗ, Үстин района «Баска» ООО, «Эрдниевский» СПК грозненск, хар һазра меринос, советск меринос, сарпан меринос, хальмг болн каракульск тохма хөөдиг эн һәәхүлд үзүлв. Терүнәс нань «Кировский» НАО ямадыг бас авч ирв.
Онц темдглхд, тохма хөөдин болн ямадын Цугәрәсән XXIII һәәхүлин ашар Хар Һазра района «Первомайский» СПК ПЗ негдгч девсңгин дипломар темдглгдв, NIVA Шевроле Тревел машинә түлкүр эдл-ахун һардач Валерий Болдыревд бәрүлҗ өггдв. Тер мет таңһчин талдан эдл-ахус һәәхүлд ончрҗ, ут тоодан алтн 14 медаляр болн цаһан мөңгн 7 медаляр ачлгдсн болдг.
Һәәхүлин йовудт Дагестан Республикин селәнә эдл-ахун болн хулд-гүүлгәнә министр Мухтарбий Аджековла нөкцлтин бооцан батлгдв. Терүнәс нань Хальмг Таңһчин селәнә эдл-ахун министрин үүл цаг зуур дааҗадг Тимур Гаваев «Дамате» компаня һардачин дарук Владислав Акуловла бачм төрмүдәр күүндҗ, нөкцлтхәр үгцв.

КАРСАНА Евгения

Видео