Хаалһнь цаһан болтха!

23-05-2023, 09:20 | Общество

Эндр таңһчин дунд сурһульмудын төгсәһәчнрин төлә сүл хоңх җиңнв. Җил болһн хаврин эн цагт 9-ч болн 11-ч классмудын арвтнрин төлә дааврта кем эклнә. Тедн сурһулин ашан диглҗ, шүүврән өгхәр белднә.

Сүл хоңх… Сурһульч болһна төлә эн керг-үүлдвр байрта болн уйдлһта болдг. Тер юңгад гихлә, негдврәр, сурһулян төгсәҗәдг темдг болна, хойрдвар болхла, негдгч классас авн хамдан сурсн, өсчбоссн, үүрлҗ йовсн көвүд-күүкд салад, цааранднь эврә хаалһар йовхмн. Сүл хоңх җиңнәд, төгсәһәчнрин төлә шин җирһлин девсң эклҗәх темдг болдг. Мел эн саамд көвүд-күүкд тәвсн күслдән күрхәр зүткнә.
Тогтсн авъясар Кичгә Төлән нертә Хальмг келн-улсин гимназьд «Сүл хоңхин» байрт эк-эцкнр, багшнр болн гиичнр хурв. Гимназин һардач Екатерина Ченкураева төгсәһәчнрт бүлән үгән нерәдҗ, җирһлин шин хаалһд күцәмҗ дурдҗ, шүүврән сәәнәр өгәд, Төрскндән туста улс болҗ йовтн, гиҗ йөрәв.Эн җил 9-ч классин 51 сурһульч, 11-ч классин 26 көвүн-күүкн гимназиг төгсәҗәнә. Тедн дунд кесгнь таңһчин болн Цугәрәсән олимпиадмудт орлцачнр болна. Үлгүрлхд, Цугәрәсән олимпиадт Альмина Дарбакова утх-зокъялар, Энкира Улюмджиева болхла һазадын келәр сән медрл үзүлҗ призермуд болв.
Темдглхд, 9-ч классмудас арвнь, 11-ч классас зурһан күн сурһулян йилһән сәәнәр төгсәҗәнә. Тедн шүүврән сәәнәр өгәд, онц хату цаасан болн медальмүд авхмн. Арвн негдгч классин төгсәһәч Алдар Бамбаев болн 1-ч «В» классин сурһульч Эльвина Тюрбеева хоңх җиңнүлхлә, төгсәһәчнрин нүднь нульмсар дүүрв…
Эн җилин төгсәһәчнр олн зүсн эрдм шүүҗ авад ик сурһульд орҗ сурхар зуралҗана. Җил болһн орн-нутгин нүүрлгч вузмудт орулхин төлә мана таңһчин төгсәһәчнрт шишлң немр ормс йилһгднә. Тегәд кесгнь талдан регионмудт йовҗ, авад ик сурһульд сурхмн. Б.Б.Городовиковин нертә Хальмг ик сурһульд җил ирвәс шин дацңгуд секгднә. Нааран бас төгсәһәчнр орхар шунна.
Терүнәс нань «Сүл хоңх» байрин йовудт гимназин олна бәәдл-җирһлд шунмһаһар орлцсн сурһульчнр Күндллһнә һашгудар болн Ханлтын бичгүдәр ачлгдв. Төгсәһәчнр багшнртан, тер мет түрүн багштан шүлгүд, дуд нерәдҗ, цецгүд бәрүлҗ ханлтан өргв.
2023-ч җилин төгсәһәчнр, шүүврән сәәнәр өгч, цааранднь тааста эрдмәрн сурч, Хальмг Таңһчдан туста мергҗлтнр болҗ йовтн гиҗ дурдҗанавидн. Хаалһтн цаһан болтха!

КАРСАНА Евгения
Зургт: Кичгә Төлән нертә Хальмг келн-улсин гимназин төгсәһәчнр багш Лидия Бадмаевала хамдан

Видео