Сурһуль-эрдмин чинринь өөдлүлхәр

23-05-2023, 09:25 | Общество

Давсн долан хонгин чилгчәр Троицкое селәнә дунд сурһулин ул деер таңһчин сурһуль-эрдмин бүрдәцсин һардачнрин хург болв. Терүнд таңһчин дунд сурһульмудын һардачнр, Дневник.ру IT компаня элч Светлана Гельфман, «Код будущего» гидг федеральн көтлврин оператор Наталья Шадрина орлцв.

Хальмг Таңһчин сурһуль-эрдмин болн номин министр Булган Ангирова хургиг секәд, эн җил мана орн-нутгт багшин болн сурһмҗлгчин җил зарлгдсн бәәнә, тегәд бидн региональн болн федеральн төсвсин тускар күүндҗ, дамшлтарн болн ухан-тоолврарн хувалцҗ, хамцу көдлмшиннь зөрүллт диглҗ авхвидн гив. Дааврта һардач таңһчин сурһуль-эрдмин халхд күцәгдҗәдг керг-үүлдврмүдин, сурһульчнрин болн багшнрин күцәмҗин тускар онц келв. Тиигәд эн җил «Сурһуль-эрдм» гидг келн-улсин төсвин керг-үүлдврмүд күцәлһнд 791 сай арслң йилһгдхмн. Келн-улсин төсвин йовудт таңһчин сурһуль-эрдмин бүрдәцст бат ясвр кегдҗәнә, немр шин бәәр тосхҗана, өдгә цага сән кергсләр теткҗ материальн-техническ улынь батрулҗана. Сурһулин шин җилд Элстд Орс келн-улсин гимназьд немр 225 орм секгдхмн, таңһчд 24 сурһульд ясвр төгсхмн, селәнә 6 дунд сурһульд спортивн зал ясгдх, 5 спортивн клуб бүрдәгдх болв. Өдгә цага шин эв-арһс делгрүллһнә, сурһульчнр IT халхар гүн медрл авлһна төлә «Точка роста» гидг 21 төв секгдхмн, 41 сурһульд шишлң таал тогтагдхмн. Һаха сарин 1-д бичкдүдин болн баһчудын билг-эрдм йилһҗ авлһна, дөңнлһнә болн делгрлтин региональн төв секгдхмн гиҗ министр зәңглв.
Таңһчин сурһульчнрин болн багшнрин күцәмҗин тускар келхләрн, Булган Борисовна Элстин лицейин сурһульч Вадим Василенко Цугәрәсән олимпиадт призер болад нер һарсинь, мана таңһч ЮФО-н болн СКФО-н субъектс дунд «Финансовая грамотность» гидг төсвд орцлад, сән гисн 10 региона тоод орсиг темдглв. Б.Б.Городовиковин нертә Хальмг ик сурһульла нөкцҗ үүлдснә ашт эн сурһулин җилд психолого-педагогическ, инженерн классмуд секгдв, өдгә цага шин сурһуль-эрдмин бүрдәцсин Ассоциац тогтсна, агроклассмудын үүлдвр дәкн эклснә тускар бас келгдв. Сурһуль-эрдмин халх делгрүллһнә, федеральн болн региональн төсвст күцәмҗтәһәр орлцсн төләднь зәрм һардачнрт Хальмг Таңһчин сурһуль-эрдмин болн номин министерствин Ханлтын бичгүд бәрүлҗ өггдв. «Финансовая грамотность» гидг төсвд шунмһаһар орлцсн Көтчнрә района Өвдгин, Шаттан, Көглтин, Октябрьск района Иҗлин, Приютна района Булуктинск дунд сурһульмуд Ханлтын бичгәр ачлгдсн деерән Келн-улсин банкин мөрәһәр темдглгдв.
Таңһчин багшнрин мергҗлт өөдлүллһнә күрәлңгин һардач Лилия Мунчинова, сурһуль-эрдмин көдләчнрин таңһчин профсоюзин ахлач Антонина Коокуева, Дневник.ру IT компаня элч Светлана Гельфман, «Код будущего» гидг федеральн көтлврин оператор Наталья Шадрина, «Цифровая Калмыкия» төвин һардачин дарук Евгений Филиппов, Элстин лицейин һардач Софья Анжирова, Хальмг ик сурһулин педагогическ номин доктор Зоя Кекеева, Хар Һазра района Артезиан селәнә дунд сурһулин һардач Гелена Немкеева хургт орлцачнрт күцәҗәх көтлврмүдин тускар цәәлһвр өгв.
Дарунь хургт орлцачнр секцсәр көдлв. Күн болһн тааста төрәр болсн күүндврт орлцҗ, соньмсулҗах төрәр цәәлһвр авв. Тиигәд, Санкт-Петербург балһснас ирсн Светлана Гельфман электронн журнал болн дневник олзлснь туста, амр болҗахин тускар келв. Шин эв-арһ олзлсн кемд эк-эцк болһн үрнь яһҗ сурчахинь, ямаран күцәмҗ бәрсинь тер дарунь гилтә үзнә. Багшнр болхла электронн кевәр цугинь күцәснә ашт дарунь тооцаһан өгч чадна, көдлмшин кемҗән баһрна гиҗ эн келв. Ода деерән таңһчин сурһуль-эрдмин болн номин министерств эн компаньла нөкцлтин тускар күүндҗәнә, сурһулин шин җилд энүнә туслмҗиг олзлдг болх чигн биз. Ирлцңгү харһлтс көдлмшән күцәмҗтәһәр бүрдәлһнд, шаңһа даалһвриг сәәнәр күцәлһнд туслхнь маһд уга.

ДООҖАН Наталья
ЗУРГТ: хургт орлцҗах таңһчин сурһулин бүрдәцсин һардачнр

Видео