Малын хальдврта гем гетлҗ

23-05-2023, 09:40 | Общество

Хөн сарин 24-д Хальмг Таңһчин ветеринарн көдләчнр сән Өдрән темдглнә. 2008-ч җилд таңһчин Толһачин зәрлгәс иштә эн өдр батлгдв. Найн һар җил хооран болхла мана таңһчд ветеринарн лабораторь секгдәд, эндр күртл малын болн герин аң-аһрусна эрүлмендинь шинҗлҗ тусан күргҗ йовна.

Хальмг Таңһчин ветеринарн лабораторин һардач Петр Гациновин келсәр, эндр бүрдәцд нәәмн әңгд ут тоодан хөрн долан күн көдлнә. Мана таңһчин район болһнд эврә ветеринарн станц бәәнә.
Мана таңһчд мал өсклһн региона һоллгч нег халхнь болҗахинь цуһар меднә, КФХ-син болн ЛПХ-син һардачнр асрҗадг малан даңгин шинҗлх зөвтә болна. Тегәд ветеринарн лабораторин мергҗлтнр теднд тусан күргнә. Темдглхд, 2019-ч җилд таңһчин ветлабораторь бруцеллез, лейкоз, лептоспироз болн нань дөрвн гемәр аккредитац авсмн. Өдрт миңһн, хойр миңһн чигн толһа бод малд, эс гиҗ хөөдт шинҗллт кегднә. Энүнә йовудт малын цусн кесг дәкҗ шалдрң эмлә хутхгдҗ, хөөннь ашнь һарһгдна.
Лабораторин серологическ әңгин һардач Анна Церенован келсәр, сүл җилмүдт баһчуд ветеринарн халхар сурһуль төгсәҗ, лабораторьт ирәд көдлҗәнә. Эн йовдл мадниг эрк биш байрлулна, тер юңгад гихлә эврәннь дамшлтарн бидн эднлә хувалцх зөвтәвидн, гиҗ Анна Борисовна темдглв. Хойр җил хооран таңһчин ветеринарн лабораторьт Сарпуль балһсна селәнә эдл-ахун ик сурһуль төгсәһәд Алексей Дорджиев иигәрән ирҗ, ветеринарн эмчәр экләд көдлв. Энүнлә хамдан баахн фельдшермүд Ксения Диканская болн Алтана Дорджиева күцәмҗтәһәр көдлҗәнә.
1983-ч җилд таңһчин ветеринарн лабораторьт Валентина Джальчинова ирҗ көдләд, эн җилд дигтә дөчн җил болв. Валентина Ивановна бүрдәцин көдләчнр дунд ик медрлтә, хамгин дамшлтта, тоомсрта мергҗлт болна. Дөчн җилин туршарт энүнә һардврт ветеринарн кедү көдләч дамшлтан өөдлүлсн болх… Валентина Джальчинова 1952-ч җилд Томск балһснд тууврт бәәсн хальмгудын өрк-бүлд һарсмн. 1957-ч җилд өрк-бүлтәһән Городовиковск района Буурл поселкд хәрҗ ирәд, тенд дунд сурһуль төгсәһәд, Башантан селәнә эдл-ахун техникумд орҗ сурв. Целинн района О.И.Городовиковин нертә мөрд өскдг эдл-ахуд күч-көлснә хаалһан эн эклв. Арвн җилдән тенд көдләд, 1983-ч җиләс авн эндр күртл Валентина Ивановна таңһчин ветеринарн лабораторьт баахн мергҗлтнрлә дамшлтарн хувалцҗ, теднән дасхҗ көдлҗәнә. Эн лабораторьт көдлн бәәҗ, Валентина Джальчинова Шарту балһснд зооветеринарн ик сурһуль төгсәв. Энд шинкн экләд көдлхднь энүнд урднь көдлҗ йовсн дамшлтта мергҗлтнр Полина Коновалова, Анна Утнасунова, Татьяна Пономарева болн талдан улс тусан күргв. Эдниг Валентина Ивановна даңгин ханлттаһар тодлна. Олн җилдән үнн-чик седклтәһәр көдләд, эн күндллһнә кесг темдгүдәр ачлгдсмн.
Дөчн җилин туршарт Валентина Джальчинова ветеринарн лабораторин кесг әңгүдин һардачар көдлсинь бас темдглх кергтә. Валентина Ивановна болхла, баһ цагасн авн тааста көдлмшән олҗ, эндр күртл седклән тәвҗ көдлҗәхинь онц темдглҗ, өөрдҗәх ветеринарн көдләчнрин сән Өдрлә йөрәҗ, цугтаднь цаһан хаалһ дурдҗанавидн!

КАРСАНА Евгения
Зургт: Валентина Джальчинова хамдан көдлҗәдг мергҗлтнрлә

Видео