Өрк-бүләрн Ямалд багшлна

23-05-2023, 09:45 | Общество

Сүл җилмүдт мана таңһчин баһчуд ик сурһулян төгсәһәд, орн-нутгин талдан регионмудт көдләд йовснь нуувч биш. Нурһлҗ Москваһур болн Әрәсән ар үзгт бәәдг балһсд тал эдн темцнә. Тер һазрт бийән сән талас үзүлҗ, седклән тәвҗ көдлнә.

Иван болн Светлана Анисовихн (зургт) 2014-ч җиләс авн орн-нутгин Ямало-Ненецк автономн округд күцәмҗтәһәр көдлҗ йовна. Тиигәрән йовхин өмн эдн хоюрн Хальмг ик сурһуль төгсәһәд, Сарпан районд багшлсмн.
Өрк-бүлин толһач Иван Анисов Сарпан района Шарнута көвүн болна. Дунд сурһулян төгсәһәд, Хальмг ик сурһулин физикин болн эсвин дацңд орҗ сурв. Мел оютн болсн цагтан Лагань балһснд өсчбоссн Светлана Сангаджиевала таньлдсмн. Светлана болхла хальмг келн-бичгин болн сойлын дацңд сурчала. Оютнр нег-негндән дуран өгәд, 2004-ч җилд өрк-бүлән өндәлһсн болдг. Баахн өрк-бүл Сарпан районд күч-көлснә хаалһан эклв. Иван Светлана хойр Шарнутд болн Кануково селәдт багшлв. Тенд седклән тәвҗ көдләд, Күндллһнә һашгудар темдглгдсн билә. Цаг давад, хойр үрән өскәд, 2014-ч җилд Анисовихн орн-нутгин Ар үзгүр йовхар шиидв. Көвүн-күүкн хойран Шарнутд аав-ээҗин хәләврт үлдәв.
Ямалын һазрт таньдг улс уга билә. Анисовихн арһ-чидлән агсад, көдлмш хәәв. Тер дарунь гилтә Надымск района дунд сурһульд ирәд, һардачлань харһад, эсвин, орс келнә болн утх-зокъялын багшнр керглгдҗәхинь медв. Цаг зуур эдн көдлҗәх ормдан хондг бәәҗ, хөөннь баахн өрк-бүлд патьр йилһгдв. Светлана патьртан сән кец-таал тогтаҗ, герин эдл-ахуг һартан авв.
Һурвн җилдән көдләд, Анисовихн ЯНАО-н Приуральск района Аксарка селәнә дунд сурһульд көдлхәр седәд, тиигәрән бәрмт цаасан илгәв. Тер юңгад гихлә Надымд зөвәр киитн бәәсн учрас халун хальмг теегт өсч-боссн улст эвго болҗ медгдв. Приуральск районд болхла теңгрин бәәдл невчкн оңдан, Надымас дулан болна. Аксарск дунд сурһулин һардач Анисовихнә бәрмт цаас хәләҗ, дааврта, дамшлтта багшнр болҗахинь медәд, дарунь зөвән өгв. Тегәд 2017-ч җиләс авн Иван Николаевич Светлана Юрьевна хойр эндр өдр күртл тенд күцәмҗтәһәр үүлдҗәнә.
Светлана Юрьевнан келсәр, эднлә хамдан багшнрин кесг өрк-бүл көдлнә. Тедн цуһар Әрәсән олн регионас ирсн элчнр мөн.
Өдгә цагт Анисовихн дамшлтта, гүн медрлтә мергҗлтнр болна. Эврәннь көдлмштән өдгә цагин некврлә ирлцҗәдг эв-арһ олзлна, эднә сурһульчнр олн зүсн марһанд, төсвст орлцад ончрсн болдг. Даавртаһар, үнн-чик седклтәһәр көдлсн төләднь Күндллһнә һашгудар эдн ачлгдсмн. Иван Николаевич ГИА-н муниципальн комиссин гешүн болна. 2022-ч җилд болхла эн «Хамгин сән классин һардач» нертә ЯНАО-н губернаторин мөрәһәр ачлгдв. Светлана Юрьевна болхла «Приуральский аргиш» нертә волонтерск җисәнә бүрдәһәчнрин тоод орна. Тенд Ямалын сойлын зөөр хадһллһна халхар үүлднә.
Иим цаһан седклтә, дааврта эк-эцкин бүлд билгтә үрд өсчән. Ууһн Николай өдгә цагт Әәдрхн балһсна медицинск ик сурһулин оютн болна. Дү күүкнь Аэлита эк-эцкнь багшлҗадг дунд сурһульд йисдгч класст сурна. «Сурһулин омг» номинацд хойрдад ончрсн болдг. Эн шулун-шудрмг күүкн сурһулян сәәнәр сурсн деерән төрскнч сурһмҗ өглһнә керг-үүлдврмүдт даңгин орлцна. Терүнәс нань Аэлита волонтер-медик болад, шидр эн халхар Цугәрәсән марһанд ончрҗ, Севастополь балһс орх путевкар ачлгдв.
Иим кевәр нег һазра мана улс орн-нутгин регионмудт күцәмҗтәһәр көдлҗ, Хальмгин нер дуудулҗ йовна. Җил болһн зунар Анисовихн төрскн теегтән аавээҗдән ирәд амрна. Өөрхн элгн-садтаһан, үүрмүдтәһән харһҗ, төрскн һазрин аһар киилҗ, сергмҗтәһәр цаган давулна.

КАРСАНА Евгения

Видео