Нег һазра Баатрин санлынь тевчв

23-05-2023, 09:55 | Общество

Ямаран чигн келн-улст неринь туурулсн Баатрмуд бәәнә. Зәрмнь талдан һазрт дәәлдҗ йовад, туурмҗта йовдл үзүлҗ, нег һазра улсин болн олн-әмтнә санлд нерән мөңкрүлв. Иим Баатрин негнь хасгин һазра үрн Карсыбай Спатаев болна.

1942-ч җилин үкр сард Сталинградас өмн үзгт бәәдг Цаца болн Борманцг нуурмудын хоорнд ик дәәлдән болв, мел тиигәрән 61-ч дивизин мөртә дөрвдгч церг темцҗ йовла. Кесг өдрин туршарт әмән әрвллго, амрлһн угаһар тедн дәәлдв. Зуг өдр ирвәс хортн дәврәд Шарнут селәнүр өөрдәд бәәв. Хортна өмнәс цергч Карсыбай Спатаев хаһрдг сум хайҗ тедниг зогсав. Туурмҗта йовдл үзүлҗ, тер саамд әмнәсн хаһцсн болдг. 1943-ч җилин мөрн сарин 17-д СССР-ин Деед Хүүвин Президиумин Зәрлгәс иштә Карсыбай Спатаевд Советин Союзин Баатрин нерн зүүлһгдсмн.
Шидр Сарпан района Шарнут поселкд К.Спатаев туурмҗта йовдларн ончрсн ормд Казахстана делегац ирҗ, санлынь тевчв. Тедниг Б.С.Санджарыковин нертә Шарнута дунд сурһулин багшнр болн сурһульчнр тосв. Хасгудын делегацин ханьд депутатнр, седкүлчнр, номтнр ирв. Тер мет Хальмг Таңһчин «Жерлестер» хасгудын ниицәнә элчнр бас керг-үүлдврт орлцсн болдг.
Сарпан РМО-н һардврин аппаратын һардач Баатр Босхомджиев, Хальмг Таңһчин сойлын болн зуульчллһна министрин селвгч Герман Санджарыков, Б.Б.Городовиковин нертә КалмГУ-н хальмг келн-бичгин болн дорд үзг шинҗллһнә күрәлңгин һардач Мингиян Лиджиев, күч-көлснә ветеран, таңһчин ачта багш, Сарпан района күндтә иргн Клара Дорджиева, Сарпан РМО-н сурһуль-эрдмин әңгин һардачин үүлиг цаг зуур дааҗадг Байр Эрендженова болн «Степной» СПК-н ветеран, медәт Василий Хамуров ахта күндтә гиичнриг бүләнәр тосв.
Түрүләд ирсн гиичнр Советин Союзин Баатр Карсыбай Спатаевин, энүнлә хамдан шарнута салдсмудын санлд нерәдсн митингд орлцв. Түүнә хөөн К.Спатаев баатр кевәр әмнәсн хаһцсн ормд йовҗ, Сарпан РМО-н элчнрлә хамдан хасгудын делегац гүрмр цецгүд тәвҗ, санлынь күндлв.
Дарунь Б.С.Санджарыковин нертә Шарнута дунд сурһульд Карсыбай Спатаевин санлд нерәдсн Баатрин ширә секлһнә керг-үүлдвр болв. Казахстана делегациг ахлҗ ирсн селкүлчнрин Академин гешүн, «Парасат» орденә кавалер Абиш Дулатбек Назарбекулыд болн педагогическ күч-көлснә ветеран, тууҗин багш Сергей Левгеевд байриг секх зөв өггдв. Сурһульчнрин Хуралын һардач, «Отечество-2023» шинҗллтин көдлмшин Цугәрәсән марһана дипломант, сурһулян йилһән сәәнәр сурдг Амулң Ходжиева болн юнармеец Хоңһр Даржагинов Баатрин ширән ард суулһгдв.
Тер мет дунд сурһульд үүлдҗәдг тууҗин болн төрскн һазр-усна музейд гиичнрин төлә экскурсь давулгдв. Терүнәс нань таңһчин ачта багш, Сарпан района күндтә иргн Клара Дорджиеван «Подвиг солдата» дегтрин презентац болсмн.
Чинртә харһлтын йовудт Баатрин зөрмг йовдлд нерәдсн утх-зокъялын болн көгҗмин керг-үүлдвр бас давулгдв. Энүнд сурһульчнр К.Спатаевин намтрин болн туурмҗин тускар тодрхаһар келв. Терүнәс нань Төрскән харсгч Алдр дәәнә орлцачнрт нерәдсн шүлгүд болн дуд олнд соңсхгдв. Келхәс, Казахстанас ирсн гиичнр дунд сурһулин музейд Советин Союзин Баатр Карсыбай Спатаевин зургта кевс белглв (зургт).
Цаг ормдан зогсхш, җилмүд давад одна… Төрскән харсгч Алдр дәәнә туурмҗта йовдлмуд тууҗд орсмн. Дорас өсч йовх баһчудт энүнә тускар эрк биш медүлх кергтә. Өмн үзгин Казахстана бәәрн улс нег һазра, Советин Союзин Баатр Карсыбай Спатаевин санлынь тевчҗ, эндр күртл әрүнәр хадһлҗ йовна. Төрскн һазртнь дунд сурһуль, уульнцс болн селәд энүнә неринь зүүнә. Өдгә цагт К.Спатаевин нертә совхозд цаһан буудян болн көвңгин элвг урһц хурана. Теегт болхла олн мал идшлнә. Казахстана өргн теегин аһуд кишгтә җирһлин, эвин, иньгллтин болн дурна туск дуд соңсгдна… Мел иим кишгтә җирһлин төлә Советин Союзин Баатр, зөргтә хасг көвүн Карсыбай Спатаев әмән өгсн болдг…

КАРСАНА Евгения

Видео