Баһчудт чик сурһмҗ өгхәр

23-05-2023, 10:00 | Общество

Наркотикүд олзллһн өдгә цагин нег бачм төр болдг. Энүнлә ноолддг шишлң бүрдәцсин кесн то-дигәр, җил ирвәс наркотикүдиг баһчуд, нег үлү арвтнр, тер мет сурһульчнр чигн олзлдгнь илдкгднә. Эннь йир һундлта. Тер юңгад гихлә, арвн һурвта-арвн тавта көвүд-күүкдин эрүл-мендд эннь ик харшлтан күргнә. Зуг арвтнр эн тоотыг учртан авлго, нег-негән дурах санатаһар, аштнь әәмшгтә гемәр гемтҗ, экэцкнртән ик зовлң учрана.

Ирлцңгү министерствс - ведомствс, бүрдәцс эн бачм төриг хаһлхин төлә даңгин олн зүсн керг-үүлдвр күцәнә. Шидр А.Амр-Санана нертә Келн-улсин дегтрин саңд «Вместе против наркотиков» гидг төрәр «төгрг ширән» сүүр давв. МВД-н, сурһуль-эрдмин болн номин министерствин, таңһчин эмнлһнә бүрдәцсин, дегтрин саңгин мергҗлтнрин орлцлһтаһар эн болв.
Керг-үүлдвриг А.Амр-Санана нертә Келн-улсин дегтрин саңгин һардач Майя Безидеева секҗ, ирлцңгү бүрдәцслә нөкцлтхдән белн бәәхән медүлҗ, эн бачм төриг хамдан хаһлый, гиҗ дурдв.
Таңһчин МВД-н наркотикүд тархалһиг бүрткдг Заллтын һардачин дарук Виктория Бадмаева мана регионд эн төрәр тогтсн бәәдлин болн ведомствин эн туст күцәҗәх көдлмшин ашин тускар цәәлһҗ келв.
«Наркотикүд олзллһна ашнь – гүлгн гем» гисн төрәр Э.Тимошкаеван нертә таңһчин гүлгн гемин диспансерин ах эмчин дарук Мира Босхомджиева илдкл кев. Тер мет таңһчин наркологическ диспансерин психиатр-нарколог Алина Васильева, «Сулда» төвин ул деер үүлдҗәдг эрүл-мендин болн гемәс саглулгч әңгин һардач Светлана Кусьминова, А.Амр-Санана нертә Келн-улсин дегтрин саңгин көдләчнр Алексей Бочаев, Татьяна Манджиева, Дина Мухтарова болн талдан министерствсин, бүрдәцсин элчнр ирлцңгү илдклмүдән олнд соңсулв.
А.Амр-Санана нертә дегтрин саңгин номин болн техническ утх-зокъялын әңгин һардач Надежда Гаряеван келсәр, иим чинртә керг-үүлдврмүд җил болһн теднә көдлмшин зурад орна. Дегтрин саңгин көдләчнр болад, бидн умшачнран, нег үлү оютнриг, сурһульчнриг иим керг-үүлдврмүдт орлцулхар даңгин зүткнәвидн, гиҗ Надежда Анатольевна темдглв. Тер мет энд бүрдәгдд һәәхүлмүдт наркотикүд ямаран харшлтан күргҗәдгин туск дегтрмүдиг, умшачнрин оньгт тусхана.
Шаңһа болн олна бүрдәцсин орлцлһтаһар баһчудын төлә сурһуль-эрдмин болн сурһмҗллһна таал тогтаҗ, эн төрәр медрләрн хувалцҗ, хамцу көдлмш күцәх болҗ «Төгрг ширәд» орлцачнр шиидв.

КАРСАНА Евгения

Видео