Приютнахн барин нәәрт орлцв

25-05-2023, 09:10 | Общество

Урдк җилд «Хальмг үнн» таңһчин олна-политическ газет 105-ч җилин өөнән темдглв. Эн ончта өөнд нерәдсн концертс таңһчин райодт болсмн. Шидр ирлцңгү концерт Приютна районд давв.

Тер мет 2023-ч җилин хойрдгч өрәлд бичгдлһнә кем өөрдәд ирв, тегәд «Калмыкия» РИА-н медлд бәәдг «Хальмг үнн», «Теегин герл», «Байр» болн «Байрта» барин һарцсин көдләчнр Приютное селәнд ирҗ, района сойлын Герт умшачнрла харһв.
Приютна района муниципальн бүрдәцин толһач Басң Манжиков (зургт) ирсн гиичнрт бүлән үгән нерәдҗ, «Калмыкия» таңһчин зәңгллһнә агентствин көдләчнр өдр болһн нег һазра улсин төлә бачм төрмүдәр газетмүдин болн седкүлмүдин халхстан статьясан барлна гиҗ темдглв. Приютнахн бичгдлһнә кемд җил болһн орлцхар зүткнә, тер мет баһ тетквртә өрк-бүлмүдт барин һарцс бичүлҗ өгнә, гиҗ Басң Вячеславович келв.
«Калмыкия» РИА-н һардач Хоңһр Мариловин келсәр, урднь мана орн-нутгин бәәрн улс дегтрмүд-барин һарцсиг хамгин олар умшдг умшачнрт тоолгддг билә. Өдгә цагт мана бәәдлҗирһлд интернет орад, баһчуд умшдган уурв. Төрскн келн-сойлан делгрүлхин төлә мана таңһчин барин һарцс бичүлҗ автн, гиҗ Хоңһр Анатольевич дуудвр кев.
Керг-үүлдврт орлцсн таңһчин барин көдләчнр эврә һарцсин тускар тодрхаһар келҗ, барт бичгдлһнә көдлмшиг шунмһадулхинь сурв.
Барин нәәрин концертын йовудт Приютна района сойлын Герт олн-әмтн хурҗ, кесгнь 2023-ч җилин хойрдгч өрәлд таңһчин барин һарцст бичүлгдснь темдгтә. Терүнәс нань «Калмыкия» РИА барас һарһсн олн зүсн дегтрмүд, таңһчин туск сәәхн зургуд, хальмг лит хулдв.
Концертд таңһчин нертә болн баахн артистнр: Хальмг Таңһчин ачта артистнр Эрвена Оргаева, Кутлан Мукубенов, Б.Б.Городовиковин нертә Хальмг ик сурһулин «Бумбин орн» ансамбль, баахн дуучнр Лиҗ Доржинов, Эльгена Церенова ахта орлцад, билг-эрдмәрн олыг байрлулв. Терүнәс нань Приютна района «Байсвр» ансамбльд орлцачнр болн Приютна билг-эрдмин сурһулин элчнр концертд орлцв.

ОЛЬДАН Цаһан
САҢҺҖИН Надеждан цоксн зургуд

Видео