Цугнь диилврин төлә

25-05-2023, 09:15 | Общество

Өдр болһн бидн шишлң цергә керг-үүлдврин йовудын тускар соньмсҗ, залу-зөрмг йовдл һарһсн цергчнрәр бахмҗ кеҗ, цуһар эдн әмдменд хәрҗ ирхиг күләнәвидн. Гертәсн болн өркбүләсн хол йовх харсачнрт даалһвран күцәһәд, диилвр бәрхин төлә цуг улсин дөң эрк биш кергтә. Шишлң цергә керг-үүлдвр эклсн цагас авн мана орн-нутгт ик-баһ уга цугтан буйнч седклин кергт орлцҗ, демән күргҗәнә, бүлән үгәрн чигн дөңнҗәнә.

Мана таңһчд үүлддг «Бидн хамдан» гидг региональн штабд әмтн авч ирсн цуг кергтә тоотыг цуглулҗ цергчнрт күргҗ өгнә. Нааран сурһульчнр, оютнр, таңһчин бүрдәцсин көдләчнр болн ах үйин улс ирҗ, цергчнриг дөңнҗәхән медүлнә. Шидр садв гемәс хөрлһнә таңһчин диспансерин көдләчнр цергчнрин төлә шишлң радиостанц авч ирв. Одахн Элст балһсна 21-ч тойгта дунд сурһулин көвүд-күүкд бас эврә дөңгән цергчнрт күргв. Эдн һуйрин зүүтә хот болһад, терүг кимдәр хулдад хоршаҗ авсн мөңгәрн цергчнрт кергтә эм хулдҗ авв. Дәкәд сурһульчнр цергчнрт бичг бичҗ, бүлән үгәрн эдниг урмдулв. Дорас өсч йовх бичкдүдин буйнч седкл мана цергчнрт эрк биш омг өгч, диилвр бәрҗ ирхд туслхнь лавта.
Целинн района Троицкое селәнә дунд сурһулин күүкд-көвүд болхла кичәлмүдин хөөн цергчнрт гөлм өлгв. Терүг районд эврә сән дурар үүлддг улсин «Сән керг күцәх цаг» гидг олна җисәнә ахлач Шаран Лейла нег һазра цергчнрт күргҗ өгв. Лейла Дурсуновнан келсәр, шидр сурһульчнр дәкәд һурвн гөлм өлгҗ авч ирв, тегәд цергчнрт бу-селмиг бүркҗ бултулх немр эв-арһ бәәнә. Һартан эвтә күүкд гөлм өлгдг дасад, сурһулиннь хөөн цаган тустаһар давулҗ олнд үлгүр болҗана.
Дәәнә болн тууврин зовлң үзсн мана ах үйин улс цергчнрин тускар ухалҗ бүлән өөмс өлгҗ, бичг бичҗ, пенсин мөңгәрн хот-хол, эм, нань чигн кергтә тоот хулдҗ авч бас буйнч седклин кергт орлцна. Элст балһснд бәәдг найн зурһата Мария Васильевна Рубежная цергчнрт шүлгән нерәдҗ, һарлдсн ачнрла әдл теднд зовҗ номдан орулҗ мөргҗәхән медүлв. Таңһчин әмтнә социальн теткврин комплексн төвмүдин ул деер «Дулан хувцн – баатрмудт» гидг керг-үүлдвр бүрдәгдв. Ээҗнр цергчнрт дулан хувц өлгҗ баһ цаган тодлна. «Дән-даҗг уга, цуһар төвкнүн-ниитә бәәтхә», - гиҗ эдн зальврна.
ОНФ «Олн әмтнә фронт. Цугнь Диилврин төлә!» гидг буйнч седклин керг-үүлдвр давулҗ, цергчнрт дөң-тусан күргҗәнә. Шидр Хальмгин профсоюзмудын Федерацин һардач Александр Шеметов ОНФ-н Хальмг региональн әңгд ирәд, цергчнрт 60 миңһн арслңга демән күргв. Энүнә келсәр, бидн цуһар эднә тускар ухалҗ арһ-чидләрн дөңнх зөвтәвидн. Келхд, таңһчин профсоюзмудын Федерац буйнч седклин кергт шунмһаһар орлцҗ, демән күргнә, хот-хоолар, эмәр болн цергә даалһвр күцәлһнд кергтә тоотар теткнә.
Таңһчин район болһн эврә цергчнрән болн теднә өрк-бүлмүдиг мартхш, теднд дару-дарунь золһҗ одна. Одахн Яшалтан района толһач Лиҗика Алдр Запорожск мүҗд церглҗ йовх нег һазра улст күрәд ирв. Района бәәрн әмтн цуглулсн тоотыг Мелитополь балһснд йовулҗ, Токмак балһснд болхла церглҗ йовх цергчлә харһв. Района толһачла хамдан зөрмгән һарһсн цергчин экнь дахҗ одв. Дәкәд района әмтн цергчнрт «УАЗ» тамһта маши йилһҗ өгв. «Бәрлдән болҗах кемд бидн хол биш биләвидн. Мана харсачнр цуг арһ-чидлән өгч ямаран күнд даалһвр күцәҗәхинь ил үзвидн. Бидн күн болһна тускар ухалҗ, удл уга цуһар эрүл-менд хәрҗ иртхә гиҗ зальврҗанавидн», - гиҗ Лиҗикә Алдр келв.
Цергә даалһвр күцәҗ йовх Төрскән харсачнрин болн теднә өрк-бүлмүдин тускар ухалҗ, ямр нег төр хаһлхд орлцҗ, дөң күргсн деерән мана орн-нутгин шин регионмудын тускар бидн бас мартхшвидн. «Бидн хамдан» гидг җисәнә седвәрәр хөн сарин 12-ас авн така сарин 31 күртл «Бичкдүд- бичкдүдт» гидг керг-үүлдвр зарлгдв. Терүнд орлцачнр Луганск болн Донецк Республикүдин, Запорожск болн Херсонск мүҗсин бичкдүдт дегтрмүд цуглулҗ авхмн. Күн болһн гертән бәәсн эс гиҗ лавкд хулдҗ авсн шин дегтрмүд авч ирҗ чадҗана. Нидн болсн эн керг-үүлдврин ашт 103 миңһн дегтр цуглулгдсн билә.

ДООҖАН Наталья

Видео