Геедрсн ахан хөрн тавн җилдән хәәҗ

25-05-2023, 10:10 | Общество

Хөрдгч зун җилин чилгчәр урднь бәәсн мана орн-нутг хүврәд, Дунд Азийд бәәдг иргнмүд Әрәсәд олар ирҗ көдлдг болв. Сән хөв-жирһл олхар эдн ик зуудан Москва балһснур темцв. Энд өрк-бүлмүдән асрхин төлә ямр чигн көдлмш кеҗ йовсмн.

1998-ч җилд Таджикистана Худжанда балһснас Джума Дадобоев Москваһур көдлхәр ирсн бәәҗ. Цаг зуур Москва балһсна мүҗд көдлҗәһәд, эн Дагестан Республикд бәәдг тоосх кеҗ һарһдг заводт тусв. Болв тенд җалвинь бүклднь өглго көдләчнриг меклдг билә. Арһан барад, олн үртә эцк заводас зулад, малчнрин хошт тусна. Зуг энд чигн бүтн хот, җалв үзлго, кесг җилдән кеер мал хәрүлҗ көдлв. Иим кевәр кесг хош соляд йовж Дадобоев Хальмг Таңһчд ирәд, 2022-ч җилин эклцәр зеткртә йовдлла харһҗ, П.Жемчуевин нертә эмнлһнд тусв.
Эн келвриг Целинн района Троицкое селәнд бәәдг медәтнрин болн эрмдгтә улсин Гер-интернатын көдләчнр 2022-ч җилин хөн сарин 20-д тедн тал бәрмт цаасн угаһар туссн залу күүнәс соңсв. Социальн бүрдәцин көдләчнр энүнд сана зовад элгн-садан олхд дөң-нөкд болхар шиидв. Болв Джума нер-усан хаҗһрар заасн учрас көлтә элгн-садынь тиигхд олҗ чадсн угавидн, гиҗ ЦДИПИ-н һардачин дарук Лариса Горяева келнә.
Түүнә хөөн гер-интернатын һардач Артур Натыров Б.Б. Городовиковин нертә Хальмг ик сурһульд Таджикистанас ирсн оютнрла харһҗ күүндсн бәәҗ. Зуг хәәврин көдлмшин ашт керг күцсн уга.
Дәкәд цаг давад нег өдр Артур Натыров Элст балһсна лавкд Дунд Азийәс ирсн оютнла таньлдҗ күүндв. Эн көвүн сурһулясн сул цагтан энд көдлдгинь медв. Артур Арашевич Джуман тууҗиг оютн Абдулла Нозировд тодрхаһар келҗ өгв. Удан боллго, тер өдрин асхар Абдулла җиңнүләд маңһдуртнь нег һазра улстаһан Троицкое селәнүр ирв. Тедн эврәһәрн Джумала күүндҗ, видео цокч авв, энүгән Таджикистана ниигмин сүлҗәнд тархасн болдг. Тер цагас авн Джуман элгн-садн Артур Натыровд өдр-сө уга җиңнүләд, эрүл-мендинь сурҗ соньмсв. Джума Дадобоев, энүнлә хамдан ЦДИПИ-н көдләчнр бас теңкән уга байрлв.
Эн җилин мөрн сарин 24-д гер-интернатд ончта йовдл болв, гиҗ келҗ болхмн. Джума Дадобоевин дү көвүнь болн дү күүкнь ахан авхар Троицкое селәнүр ирв. Шарифа дү күүкнь Таджикистанас, Джаббор дү көвүнь болхла Сахалинас һарад, хоюрн Москвад харһад такси нәәмәдлҗ авад Троицкое селәнүр ирсмн. Тер өдр ах-дүүнр харһад, нег-негән теврәд халун нульмсан асхрулҗ, кесгтән күүндв.
Темдглхәс, өөрхн элгн-садн хөрн тавн җилдән ахан хәәсн бәәҗ. Тедн «Жди меня» нертә соңсхврт кесг дәкҗ бичг бичсн билә, талдан чигн эв-арһар Джумаг хәәсмн. Эн җилмүдин туршарт дөрвн күүкнь өсч-босҗ хәрд һарв. Ода Джума Дадобоев арвн долан зеетә аав болв.
Энүнә өөрхн элгн-саднь Целинн гер-интернатын һардврт, көдләчнрт ик гидг ханлтан өргв.
Гертән хәрҗ ирәд, Дадобоевин ик, ниитә өрк-бүл харһлтын йовудыг телефонд бичҗ Хальмг Таңһчур илгәв. Джуман авальнь, үрднь, зеенрнь цугтан социальн бүрдәцин көдләчнрт бас зүркни ханлтан медүлв.
Иим кевәр бүкл хөрн тавн жилин туршарт күцәгдсн хәәврин көдлмш сән аштаһар төгсв.

КАРСАНА Евгения
Зургт: Джума Дадобоев өөрхн элгн-садтаһан болн Целинн района Геринтернатын көдләчнрлә

Видео