Келн-улсин хоорндк нөкцлт батрулҗ

25-05-2023, 10:25 | Общество

Шидр шаҗна халхар ончта нег йовдл учрв: Хазна чонҗин гегәрлтин төвд шаҗна әрүн чинртә номиг орчулдг күрәлңгин элчнрин барлҗ һарһсн “ Мошен тавн дегтрин” презентац болв. Энүг әрүн Кирилл болн Мефодий гегәрүлгчнрин байрт нерәдәд, Элстин болн Хальмгин епархий эн күрәлңгин орлцлһтаһар бүрдәсн болдг. Эн керг- үүлдвриг Элстин болн Хальмгин ик цолта гелң Юстиниан һардҗ давулснь басл темдгтә болв. Деер келгдсн күрәлңгин һардачин дарук Наталья Горбунова болн селвгч Алексей Сомов телеүзләр дамҗад бас эн ончта йовдлд орлцсинь заах кергтә.

Элстин хазна чонҗин сурһулин “Байр” нерәдлһтә бичкдүдин хор дуулад,таңһчин Орс театрин артистнр болхла эн дегтрин зәрм әңгүдинь орс болн хальмг келәр умшад эн керг-үүлдвриг эклв. Дарунь үг авсн гелң Юстиниан эн әрүн дегтрин чинринь онц темдглҗ, энүг хальмг келнд орчулсн улст зүркни ханлтан өргв. Энүнә келсәр, эн дегтр хальмг болн орс келн-улсин хоорндк хәрлцән улм батрҗ,хальмгудын сойл делгрүллһнд ик тәвцән орулҗадг болна. “Мошен тавн дегтр” шаҗнд шүтдг әмтнд бәәтхә цугтаднь чигн олзта- туста болхнь лавта. Хальмг кел меддг,хальмгар келдг улст эн дегтр умшхд,энүнә чинринь сәәнәр медхд амр болхмн. Кенд, ямр бурхнд шүтснь йилһл уга, ямр чигн шаҗн кен- негнь өр-өвч, буйнч седклтә болсарн өөркстән арһ- чидләрн дөң- нөкд болх сурһмҗ өгнә,”- гиҗ Юстиниан келәд,цуглрсн улсиг эн байрла йөрәв. Хальмг келнд орчуллһна төсвин тускар тодрхаһар Наталья Горбунова цәәлһҗ келв.
Дарунь эн керг-үүлдврт орлцсн таңһчин сойлын болн зуульчллһна министрин селвгч Саңҗрһа Герман,- Хальмг ик сурһулин хальмг келнә тиңкмин һардач, профессор Муушан Владимир, хальмг кел делгрүллһнә Төвин һардачин үүлиг цаг зуур дааҗадг Төрбатан Очр ирлцңгү дегтр төрскн кел хадһллһна болн делгрүллһнә халхар нег үлү ик чинр зүүҗәхинь дәкн нег тодлулҗ,орчуллһна көдлмшт орлцсн улст Ханлтын бичгүд бәрүлҗ өгв.
Элстин болн Хальмгин ик цолта гелң Юстиниан ашлгч үгән келхләрн, “Мошен тавн дегтр” орчулсн хальмг улсин шүлгч Шугран Верад (зургт) болн ирлцңгү төсвд орлцсн Шинәкән Элистинад епархин нерн деерәс Күндллһнә һашгуд бәрүлҗ, Хальмгт келн-улсин болн шаҗна хоорндк нөкцлтиг батрулҗах төләднь магтал өргҗ бүлән үгмүдән нерәдв. Вера Киргуевнан тоолврар болхла, эн дегтр кен-негнднь уха зааҗ,чик сурһмҗ өгч, сарул-сәәхн җирһлин хаалһд орхднь туслҗадг болна. Байрин харһлтд ирсн улст Элстин 2-ч тойгта дунд сурһулин дуучнрин баг “ Келн- улсин иньгллт” гидг нертә көгҗмин наад үзүлснь бас ке болв.
Презентацин чилгчәр эн кергүүлдврт орлцачнрт,тер тоод балһсна сурһульмудын хальмг келнә болн утх-зокъялын багшнрт,дегтрин саңгудын көдләчнрт, “Мошен туск дегтрмүд” белглв.

ШАГҖИН Любовь

Видео