Таңһчин сән гисн өрк-бүлмүд ачлгдв

27-05-2023, 09:15 | Общество

Эн долан хонгт Элстд «Җилин сән гисн өрк-бүл» гидг Цугәрәсән марһана таңһчин девсңд ончрсн өрк-бүлмүдиг цуглулад, үр-иньгин таалд эдниг тооһад, ачлвринь бәрүлҗ өгв. Күүкдтәһән болн ачнр-зеенртәһән ирсн өрк-бүлмүд хоорндан таньлдад, билг-эрдмән үзүлҗ цаган сергмҗтәһәр давулв. Хальмг Таңһчин залврин Ахлачин дарук– таңһчин социальн делгрлтин, күч-көлснә болн көдлмшәр тетклһнә министр Өлзәтин Марина эдниг йөрәһәд, федеральн марһанд орлцҗ диилвр бәрхиг дурдв.

- Эн марһан бичкдүдиг дөңнлһнә, өрк-бүлин чинриг болн эк-эцкнрин даавриг өөдлүллһнә туск Әрәсән Президентин зәрлгин тогтаврар бүрдәгднә. Мана таңһчд сән гисн өрк-бүлмүдиг йилһҗ авлһна марһан нәәмн җил дарандан давулгдҗана, эн цагин эргцд 150 өрк-бүл терүнд орлцв. Баһ наста, олн үртә, тәвн һар җилдән хамдан бәәдг, өвкнриннь авъяс хадһлдг, хальмг келндән хару, төрскнч седклтә бүлмүд марһанд орлцҗ, билг-эрдмән үзүлнә. Келхд, марһанд диилвр бәрсн өрк-бүлмүд цуһар седвәртә, дууч-биич, һартан өөтә, хоорндан ниитә болна. Эдн олнд үлгүр болдг, отг-әәмгтән күндтә болн тоомсрта өрк-бүлмүд, тегәд чигн эднә диилвр нег һазра улст ик бахмҗ үүдәнә. Темдглхәс, мана таңһчин элчнр Цугәрәсән марһанд эрк биш диилвр бәрҗ, нер һарна. Өрк-бүл бат, ниитә болхла, мана орн-нутг бас бат болхнь лавта, тегәд иим марһас эрк биш кергтә. Әрәсән Президент «Мать-героиня» гидг өөдән ачлвр дәкнәс бәрүлҗ өгдг болв, олн үр асрсн экд өгдг демин мөңгнә кемҗән өсв. Мана орн-нутгт нилхд төрлһиг урмдуллһна, сурһуль-эрдмин бүрдәцст немр орм бүрдәлһнә, бичкдүдин болн саата күүкд улсин эрүл-менд батруллһна болн күргҗәх туслмҗин чинр ясруллһна төрт ик оньг өггднә. Тегәд «Җилин сән гисн өрк-бүл» гидг Цугәрәсән марһан «Мини өрк-бүл – мини Әрәсә» гидг дуудвртаһар хара биш давулгдҗана, - гиҗ Марина Петровна келв.
Эн җил таңһчин марһанд 19 өрк-бүл орлцад, селән һазрт бәәдг, өвкнриннь авъяс хадһлдг болн баахн сән гисн өрк-бүлин нер зүүхәр шунв. Харм төрхд, хойр җил дарандан тәвн һар җилдән хамдан бәәдг өрк-бүлмүд марһанд эс орлцҗадг учрар «Алтн өрк-бүл» гидг номинацд дииләчнр йилһгдҗәхш. Жюрин гешүдт номинац болһнд дииләчнриг шүүҗ авхд зөвәр дашката болв гиҗ эдн темдглв. Тернь учрта, юңгад гихлә цуһар билгтә, өвәрц болн седвәртә болҗахан медүлхәр зүткв. Тавн үртә Чингиз болн Раиса Боктаевихн олн үртә өрк-бүлмүд дунд диилвр бәрв, эдн һурвн күүктә болн хойр көвүтә эк-эцк болна. Герин эзн олн җилдән цергә халхар үүлдҗ йовсмн, эдн Ар Кавказин регионд бәәсмн, сүл җилмүдт төрскн һазртан ирҗ бәәршлв. Тавн үрнь эк-эцкән дураҗ билгтә, төрскн келндән, сойлдан болн тууҗдан дурта улс болҗ өсчәнә. Роман болн Булган Баташовихн баһ наста өрк-бүлмүдәс ончрв, зуг эдн олн үртә болн өвкнриннь авъяс хадһлдг өрк-бүлмүдин номинацд бас орлцҗ чадхмн билә. Эдн һурвн күүктә баахн экэцк, хальмг келндән хару, сойлдан дурта улс болна. Билгтә, үүдәгч баахн өрк-бүләс баһчуд үлгүр авх зөвтә гиҗ жюрин гешүд темдглв. Авъяс хадһлдг өрк-бүлмүд дунд Көтчнрә района Ергенинский селәнд бәәдг Виктор болн Замира Манджиевихн диилвр бәрснь орта болв. Эдн өсәд-боссн төрскн һазртан бәәнә, өвкнриннь авъясар кен ахан күндлҗ, кен бичкнән эрклүлҗ, дөрвн зүсн малан өскҗ, күүкдтән чик сурһмҗ өгчәнә, отг-әәмгтән күндтә-тоомсрта улст тоолгдна. Көтчнрә района дәкәд нег элчнр Шемнр селәнд бәәдг Олег болн Деляш Болдановихн селән һазрт бәәдг өрк-бүлин номинацд йилһрв. Эднә өрк-бүл өөдән балл хоршаһад, эн җил таңһчин сән гисн өрк-бүл болв. Номинац болһнд ончрсн өрк-бүлд 50 миңһн арслңга сертификат бәрүлҗ өггдв. Болдановихнә өрк-бүл болхла һол мөрә шүүҗ авсн төләдән дәкәд 100 миңһн арслңгар болн дииләчин дипломар ачлгдв.
Олег болн Деляш Болдановихн таңһчиннь нер харсч Цугәрәсән марһанд орлцх зөв авв. Болв номинацд диилвр бәрсн өрк-бүлмүд терүнд бас орлцҗ чадҗана. Марһана аш намртан медгдх, тегәд мана элчнр эрк биш нер һарх гиҗ бидн ицҗәнәвидн.

ДООҖАН Наталья
ЗУРГТ: ачлвр авсн өрк-бүлмүд

Видео