Бәәрн эмнлһсин үүлдвриг шинҗлв

30-05-2023, 09:15 | Общество

В.А.Алмазовин нертә Келн-улсин медицинск шинҗллтин төвин (НМИЦ) мергҗлтнр мана таңһчур ирәд, бәәрн эмнлһсин үүлдвр шинҗлв. Федеральн төв болн мана таңһч хоорнд нөкцлт җил ирвәс батрҗана. Төвин мергҗлтнр мана эмнлһст көдлмшин чинр өөдлүллһнд дөңгән күргҗ, дамшлтарн хувалцна.

Эн өдрмүдт федеральн төвин элчнр Элстин поликлиникин, П.Жемчуевин нертә таңһчин болн Сарпан района эмнлһсин үүлдвр бүрткҗ хәләһәд, эмнлһнә дөңгин чинринь шинҗлв. Тер мет таңһчин эрүл-менд харлһна министерствд болсн шишлң видеоселекторн селвлцәнд НМИЦ-н һардач, ЮФО-н штатн биш кардиолог Евгений Шляхто орлцв. Селвлцәнд таңһчин кариологическ болн зүркн-судцна цергллтсин көдлмшин, гемтә улст түргн дөң күрглһнә төрмүд хәләгдв.
В.А. Алмазовин нертә Келн-улсин медицинск шинҗллтин төвин комиссь таңһчин эмнлһсин үүлдвриг үнлҗ, илдкгдсн зәрм дуту-дундсиг уга келһнә туст неквр тәвв. Хамцу үүлдвр әмтнд сән чинртә эмнлһ болн түргн дөң күрглһнд, эднә әм аврлһнд туслна, гиҗ селвлцәнд орлцачнр темдглв. Федеральн төвин мергҗлтнр таңһчин эмнһлст учрҗадг кадрмудын, эмнлһнә сурһульмудла нөкцлт делгрүллһнә, бәәрн кадрмуд белдлһнә төрмүдәр ухан-тоолврарн хувалцв.

ДООҖАН Наталья
ЗУРГТ: эмчнр шин кергсл олзллһна туст мергҗлтән өөдлүлҗәх кем

Видео