Олн үртә экнр болад

01-06-2023, 09:35 | Общество

Хальмг Таңһчар үүлддг Әрәсән социальн саңгин әңгин барин цергллтин зәңгәр, 2080 олн үртә эк пенсьт болзгасн урд һарв. Теднәс тавн үр өсксн 1854, дөрвн үртә 119 болн һурвн үртә 107 эк даатхлһна пенсь авдг болв.

2019-ч җиләс авн цаг болзгас урд пенсьт һарх зөв авсн олн үртә экнрин то өсв. Урднь зуг тавн болн терүнәс үлү үр өсксн экнр болзгас урд пенсьт һарх зөвтә бәәсн болхла, ода һурвн болн дөрвн үртә экнр бас тиим зөвтә болв. Кемр күүкд күн дөрвн үр асрсн болхла, эн 56 наснд күрхләрн пенсьт һарч чадҗана. Һурвн үртә эк һурвн җил эртәснь пенсь авдг болхмн. Тавн үр һарһсн эк 50 нас күрәд, ачта амрлһнд һарна.
- Болзгас урд пенсьт һархин төлә күүкд күн 15 җилдән көдләд, даатхлһна стаж хоршах болн күүкдән баһ гиснь нәәмн нас күртлнь асрх зөвтә. Үрән күсдундур җил күртлнь асрлһна амрлһнд бәәсн цагнь бас күч-көлснә тоод орхмн, - гиҗ Хальмг Таңһчар үүлддг ОСФР-ин пенсь болн социальн демин мөңг дигллһнә әңгин һардач Батыра Светлана цәәлһв.
Үр күүкшлҗ авсн экнр бас болзгас урд ачта амрлһнд һарх зөвтә болна. Зуг бичкн нәәмн нас күрәд уга цагт терүг күүкшлҗ авх зөвтә.

Мана зәңгч

Видео