Арһлачнр шаңһа дем авчана

08-06-2023, 09:15 | Общество

Давсн долан хонгин чилгчәр Хальмг Таңһчин залврин сүүр болв. Терүнд ЮФО-д Әрәсән Президентин күцц зөвтә элчин аппаратын федеральн инспектор Александр Беляев, Хальмг Таңһчин Улсин Хуралын (Парламентин) Ахлачин дарук Сергей Сухинин, таңһчин күцәгч федеральн йосна органмудын, дунд шишлң сурһуль-эрдмин бүрдәцсин һардачнр, райодын муниципальн бүрдәцсин толһачнр орлцв. Сүүриг таңһчин залврин Ахлач Босхмҗин Гилән нүр үгәр секәд, хәләгдҗәх төрмүд чинртә болҗана, гиҗ темдглв. Дарани сүүрт баһ болн дунд бизнес делгрүллһнә, дунд шишлң сурһуль-эрдмин халхин, «Эрүл-менд харлһн» гидг келн-улсин төсвин «Эрүл-менд харлһна түрүн дөң күрглһнә халх ясруллһн» гидг региональн көтлвр күцәлһнә төрмүд хәләгдв.

Таңһчин экономикин болн хулд-гүүлгәнә министрин үүл дааҗадг Чиҗин Андрей «Мини керг» гидг региональн төвин, Хальмг Таңһчин делгрлтин болн үүлдвр делгрүллһнә саңгуд нөкцҗ үүлдснә ашт таңһчд арһлачнрин то икдҗәнә гив. Тиигәд, сүл кесн то-дигәр, эндр мана таңһчд баһ болн дунд бизнесин халхд 13,5 миңһн субъект үүлдҗәнә, давсн җиллә дүңцүлхлә эднә то 30,9 процентд өсв. Эн җилин тавн сарин эргцд 1,7 миңһн арһлач алвна мөңгән амр кевәр өглһнә диг-дара олзлҗана, эдн нидн үүлдврин ашт таңһчин бюджетд 1,1 җува арслң орулв. Ирлцңгү керг-үүлдврмүд «Баһ болн дунд бизнес болн арһлачнрин седвәр дөңнлһн» гидг келн-улсин төсвин медлд күцәгднә. Эн җилин тавн сарин эргцд келн-улсин төсвин халхар арһлачнрт 352,1 сай арслңга дөң күрггдв. Хальмг Таңһчин делгрлтин саң 2020-2022- ч җилмүдт инвестиционн төсвс күцәлһнд 795 сай арслң йилһв, эн мөңгәр 42 төсв бәәдл-җирһлд тохрагдв.
Сүл цагт дунд шишлң сурһульэрдм сән делгрлт авчахин тускар таңһчин сурһуль-эрдмин болн номин министр Анһра Булган зәңглв. Тиигәд, эн җил мана таңһчд бәәдг 11 дунд шишлң сурһуль-эрдмин бүрдәцд 8 миңһн оютн сурчана, эдн 50 эрдм дасчана. Оютнрин 20 процентнь өнчн, гемтә-шалтгта, эк-эцкиннь тетквр уга үлдсн, болн баһ тетквртә бичкдүд болна, тегәд дунд шишлң сурһулин бүрдәцс эднә социальн харслтын төрмүд хаһлҗана. Дааврта һардачин келсәр, «Баһ наста эрдмчнр» гидг региональн төсвин керг-үүлдврмүд күцәгдҗәхәс иштә сурһулин бүрдәцсин үүлдвр ясрулгдҗана, теднә улд «Эрдмчнр» болн «Абилимпикс» гидг марһас болна. Сурһулян төгсәҗәх баһчуд тааста болн туста эрдм шүүҗ авхд келнулсин «Сурһуль-эрдм» төсвин халхд давулгдҗадг «Бичкн болһна күцәмҗ» гидг үүлдвр ик тусан күргнә, гиҗ министр заав. Таңһчин 45 сурһулин 6-ч классас авн 1600 сурһульч эн җил төсвд орлцҗана. Шин сурһулин җилд тосхлтын, селәнә эдл-ахун болн талдан чигн халхар эрдм даслһна көтлврмүд немгдхмн гиҗ зуралгдҗана. Таңһчин бүрдәцсин төлә көдлмшч эрдмтә баһчуд керглгдҗәнә, тегәд эн туст көдлмшән шунмһадулх күсл тәвгдҗәнә.
«Эрүл-менд харлһн» гидг келн-улсин төсвин медлд эн җил Лаганя болн Ик Буурла райодын эмнлһнә бүрдәцсин төлә шишлң 3 көлг хулдҗ авхмн, эн кергт 2596,0 миңһн арслң йилһгдхмн. Келн-улсин төсвин халхар дәкәд ямр төрмүд хаһлгдхин тускар таңһчин эрүл-менд харлһна министр Саран Булат тооцаһан өгв. Городовиковск болн Приютна райодт поликлиникин тосхлт эклв. 2021-2022-ч җилмүдт таңһчин эмнлһсин төлә 49 кергсл хулдҗ авгдв, 13 модульн ФАП болн эмчин амбулаторь, олна дамшлтын эмчин 9 офис тосхгдв.

Барт белдснь БАТАН Сәәхлә

Видео