Зуурм һарсн нилхдт туслхмн

08-06-2023, 09:20 | Общество

Бичкдүдиг харслһна нарт-делкән Өдрлә О.Шунгаеван нертә нилхд төрлһнә төвд КРО ВОА-н ахлач, таңһчин МВД-н Олна хүүвин гешүн Гиляна Ванькаевала харһлт болв. Эн бүрдәцин нерн деерәс зуурм һарсн бичкдүдин әңгд эмнлһнд олзлгдх кергсл белглв.

Ванькаевихнә өрк-бүлд тавн җил хооран зуурм һарсн отхн көвүнь 920 грамм чиңнүртә бәәсмн. Эмчнрин килмҗтә хәләврт болн сән эмнлһнд бәәсн нилх бооҗад, дарунь эдгв. Тер мет «кенгуру» гидг эв-арһ олзлҗ, эк-эцкнь үрән теврәд, өрчдән шахад арднь орҗ хәләснь бас туслв. Тегәд цаг болзгасн урд һарсн нилхдин төлә шишлң сандл олзлҗ экнр үртәһән цаган давулхин төлә Гиляна Ванькаева терүг белглхәр шиидв.
- Мана таңһчд зуурм һарсн нилхдиг эмнлһнд эн эв-арһ олзлгдхш, болв ода шин сандл олзлҗ экнр үрән теврҗ хамдан цаган давулдг болх. Мана белг зуурм һарсн бичкдүдиг асрлһнд туслх гиҗ ицҗәнәвидн. Экиннь зүркнә цоклһ соңссн, энүнә килмҗин болн дурна күч медсн нилхд тогтнад, дарунь эдгнә. Мана көвүн эрүл-менд өсчәхнь эмчнрин күцәмҗ болна, дәкәд эн эв-арһ олзлснь бас туслв. Бидн цааранднь чигн буйнч седклән медүлҗ нилхд төрлһнә төвд демән күргхәр зуралҗанавидн. Мана нөкцлт дорас өсч йовх баһ үйин эрүл-менд батруллһнд туслтха, – гиҗ Гиляна Вадимовна келв.
Нилхд төрлһнә төвин ах эмч Галина Динкиеван келсәр, эн җилин эклцәр 21 нилх зуурм һарв. Ода 980 грамм чиңнүртә нилх реанимацин әңгд эмнлһ авчана. Болзгасн урд һарсн нилхдин экнр хойр-һурвн частан өөрнь бәәнә, ода болхла эдн эн сандлд сууһад, үрән зүркндән шахҗ удан цагт хамдан бәәҗ чадхмн. Төвд ода дөрвн әңг үүлднә, эннь олн зүсн гемтә нилхдин, реанимацин болн хойр олна әңг мөн. Энд зуурм һарсн нилхдиг асрлһна болн эмнлһнә керг-үүлдврмүд күцәгднә. 2020-ч җилд Хальмг Таңһчин Толһачин дөңгәр 24 сай арслң йилһгдсмн, эн мөңгн нилхдин реабилитацин әңг секлһнд һарв, шишлң кергсл хулдҗ авгдв, гиҗ Галина Капитоновна келв.
Темдглхәс, КРО ВОА 2017-ч җиләс авн «Хальмгин бичкдүдт – бичкдүдин автокресл» гидг социальн төсв күцәсмн. Эн җилмүдин эргцд олн үртә 20 өрк-бүлд машин дотр углҗ тәвдг бичкдүдин сандл белглсмн.

ДООҖАН Наталья
ЗУРГТ: харһлтын кем

Видео