Хальмгин сән гисн эд-тавр йилһгдв

08-06-2023, 09:25 | Общество

Хальмг Таңһчин экономикин болн хулд-гүүлгәнә министерствин зәңглсәр, «Хальмг Таңһчин сән гисн 100 эд-тавр» гидг марһана аш диглгдв. Министрин үүл дааҗадг Андрей Чиджиев марһанд диилвр бәрсн арһлачнрт диплом бәрүлҗ өгв.

- Таңһчин сән гисн эд-таврин марһанд дииләчнриг цаһан седкләсн йөрәҗәнәв. Тадн таңһчин экономикин делгрлтд ик тәвцән орулҗанат, кеҗ-һарһҗах эд-таврин чинриг шин кемҗәнд өөдлүлҗ шунҗ үүлдҗәнәт. Мана нөкцлт улм батрад йовх гиҗ ицҗәнәв, үүлдвртн күцәмҗтә болн олзта-туста болтха, – гиҗ дааврта һардач келв.
Таңһчин сән гисн эд-таврин марһан «Әрәсән сән гисн 100 эд-тавр» гидг Цугәрәсән марһана йөвудт эрк биш давулгддг девсң болна. Марһанд орлцачнр эд-тавриннь чинр ясрулна, шин залһлда батрулна, дамшлтарн хувалцна, үүлдврән делгрүлхин төлә шинҗләчнрин сүв-севлг авна. Эн марһанд орлцлһн арһлачнрт эрк биш туста болна гиҗ эдн бийснь темдглв.
Эн җил марһанд «Сувенирн эд-тавр» гидг номинацд арһлач Евгений Хюсеев, «Сойлын, туризмин, гиичлүрин халхд туслмҗ күрглһн» гидг номинацд «Элит» гидг ООО, «Эмнлһнә, санаторн-курортн туслмҗ» гидг номинацд «Түрүн бичкдүдин шүд эмнлһн» ООО, «Спортын болн сурһуль-эрдмин халхд туслмҗ күрглһн» номинацд «Ойрат арена» спортивн төв, «Тосхлтын туслмҗ» номинацд болхла «Строй-Инвест 1» бүрдәц диилвр бәрв.
Марһан 2020-ч җиләс авн шинәс давулгддг болв. Терүнд диилвр бәрсн мана арһлачнр Цугәрәсән марһанд күцәмҗтәһәр орлцҗ, Хальмг Таңһчд кеҗ-һарһгддг эд-тавриг олнд үзүлҗ, нерән өөдән бәрҗ йовхнь темдгтә. Хальмгин арһлачнр Мария Кнуреван болн Делгр Сарангован кеҗ һарсн эд-тавр орн-нутгин сән гисн 100 эд-таврин тоод орв.

БАТАН Наталья
ЗУРГТ: дииләчнриг ачлҗах кем

Видео