Зөргтә дәәчин санлынь мөңкрүлҗ

08-06-2023, 09:40 | Общество

Төрскән харсгч Алдр дән төгсәд, найн шаху җил давсн бийнь тиигхд учрсн йовдлмуд ода күртл әмтнә тодлврт сергәгдәд йовдгнь басл зөвтә эсий? Тер һашута цагт Сарпан района Садовое селәг һалзу хортнас сулдхлһнд орлцад, әмнәсн хаһцсн зөргтә башкир күүкн Зайтуна Альбаеван тускар мана газетд урднь кесг дәкҗ бичләвидн. Темдглхәс, эн җилин моһа сарин чилгчәр Зайтунан төрскн Киргиз-Мияки селәнә хәәврин багин гешүд Вильсур Нафиковин һардвртаһар дәкнәс мана таңһчур гиичлҗ ирәд, нег һазра күүкнә оршаврин орм олҗ авсн болдг.

Келхд, Сарпан района хазгуд одмн Евгений Перфильевлә хамдан кесг җилин эргцд Зайтунан цогц оршагдсна орминь хәәһәд, баһ биш көдлмш күцәсмн. Хәрнь, моһа сарин 29-д эн хәәврин көдлмш төгсәд, Зайтунан әмнь һарсн ормнь илдкгдәд, зөрмг дәәчин цогцнь дәкнәс оршагдсн билә. Хол Башкортостанд бәәдг Зайтунан элгн-садн эн зәңг соңсад, ик гидгәр байрлҗ,санлынь күндлҗ мөңкрүлхәр оршагдсн һазртнь бумблв босхх шиидвр авсн болдг. Тегәд хөн сарин чилгчәр эднә делегац седклин санаһан күцәх күслтәһәр Сарпан района Садовое селәнд дәкнәс гиичлҗ ирснь тер.
– Ямаран бумблв кеҗ һарһхин, яһҗ нер-усинь темдглхин туст мана элгн- садна дунд ямр ик зүтклдән учрв гиһит, – гиҗ өдгә цагт Германьд бәәдг Зайтунан ач күүкн Зайтуна Ареткулова келв. – Һарлдсн ахнр-дүүнрнь ода Башкортостанд уга бийнь Зайтунан үйнрин үрднь мөңгән цуглулад, бумблв кеҗ һарһад,- цугтан Хальмг Таңһчд ирсмдн тер. Хол һазрас гиичлсн Фаниль Сатаров, Лилия Саяхова, Рамиля Халикова, Ирек болн Рузиля Хабибуллинихн, Регина Ямалтдинова, Вильсур болн Алсу Нафиковихн баатр йовдл үзүлҗ, нег һазра улсин нер туурулсн Зайтуна Альбаеван санлынь тевчҗ, бумблв босхлһна байрин керг-үүлдврт орлцхар ирв.
Сарпан района муниципальн бүрдәцин толһач Басң Манджиев холас ирҗ йовх гиичнриг Хальмг Таңһчин меҗә деер бүләнәр тосад, хадгуд татад, халун хальмг цә-боорцгар тоов. Дарунь эдн цугтан Садовое селәнд ирҗ, Зайтунан цогц оршагдсн һазрт одв. Төрскән харсгч Алдр дәәнә цагт селәнә захд Песчанка өөдмд ик гидг дәәлдән болсмн. Ода бийнь энүн деер давшҗ һархла, цуг селән сәәнәр үзгднә. Дәәнә цагт болхла минь энд углгдсн харулчнрин бәәрнд селән тал дәврәд орҗ йовсн хортыг зогсахин төлә башкир күүкн Зайтуна сүл әмсхл күртлән зөрмг кевәр дәәлдсн болдг. Бәәрн улс отг- әәмгинь харсад, әмнәсн хаһцсн дәәчин санлынь мөңкрүлҗ, района төв селәнә нег уульнцд Зайтуна Альбаеван нер зүүлһсн мөн. Тегәд гиичнр эн уульнцд бәәдг әмтнлә болсн үр-иньглгч харһлтд орлцснь бас орта болв гих кергтә.
Дарунь Зайтуна оршагдсн ормд бумблв углҗ тәвлһнә керг-үүлдвр эклв. Сарпан района болн селәдин һардврин элчнр, бәәрн хазгуд, Садовое селәнә дунд сурһульмудын юнармейцнр, бәәрн улс зөрмг күүкнә санлынь тевчхәр байрин митингд олар цуглрв. Төв селәнә дегтрин саңгин көдләч Татьяна Пугачева эн керг- үүлдвриг чадмгар давулв. Сарпан РМО-н толһач Басң Манджиев, Хальмгин хазгудын цергә Сарпан района одмн Евгений Перфильев, Д.Маковкинә нертә Садовое селәнә 2-тойгта дунд сурһулин багш Лариса Федорова, «Память Мияки» хәәврин багин һардач Вильсур Нафиков болн Зайтуна Альбаеван элгн-садн зөргтә дәәчиг тодлҗ, бахмҗта үгмүд келв. Эн керг-үүлдврт орлцсн мусульман улсин гелң санлын ном умшсна хөөн бумблвд гүрмг цецгүд тәвгдв.
– Садовое селән ода мадна төлә нег үлү өөрхн болв,юңгад гихлә энд Төрскән харсгч Алдр дәәнә цагт баатр кевәр дәәлдсн мана садн күүкн оршагдв, энд бәәдг цаһан седклтә,өр- өвч улсла таньлдсндан байрта бәәнәвидн, – гиҗ Фаниль Сатаров митингд келв. Лилия Саяхован үгәр болхла, эдн цугтан өөрхн элгн-садна үкәрт ирҗ мөргәд һарсна дару седклнь санамрдад байрар дүүрсн болв.
Эн өдрин бийднь гиичнр Садовое селәнә Д.Маковкинә нертә 2-ч тойгта дунд сурһулин хашад босхгдсн Зайтуна Альбаеван бумблвд гүрмр цецгүд тәвәд, улсин сойлын төвд болсн харһлтд орлцв. Эн төвин һардач Владимир Василенко бәәрн музейд гиичнриг орулҗ, соньн кесг тоотла таньлдулв.Эврә дурар үүлддг бәәрн артистнр бүрдәсн концерт чигн гиичнриг йосндан байрлулв.
Нег үлү сүл саамд Сарпан районд ирсн гиичнр эрк биш һурвн Баатрин төрскн селән Салын Тугтнд орад һардгнь ода нам сән авъяст тохрҗадг бәәдлтә. Бәәрн селәнә муниципальн бүрдәцин толһач Аркадий Доржинов Башкортостанас ирсн үүрмүдиг бүләнәр тосад, Советин Союзин Баатрмуд Делгә Эрднин болн Бадмин Эрнцнә, Әрәсән Баатр Геннадий Лячинә санлд нерәдәд босхгдсн ик бумблвин тускар тодрхаһар келҗ өгв. Селәнә дегтрин саңгин көдләч Светлана Басангова болхла нег һазра улсин баатр йовдлмудын туст цәәлһвр өгч, музейд соньн экскурсь бүрдәв. Түрүн болҗ Хальмг Таңһчд ирсн улсиг эн келвр икәр соньмсулв, иим бичкн селәнд нерән туурулсн һурвн Баатр өсч-босснь йоста бахмҗ үүдәв гих кергтә.
Гиичнр хәрлһн деер болсн харһлтд района толһач Басң Аркадьевич Зайтунан элгн-садн дорас өсч йовдг үйнрт төрскнч сурһмҗ өгч, әрүн чинртә керг күцәснд зүркни ханлтан өргв. «Ода киргизмиякинцнр мадна төлә йосндан өөрхн улс болв. Тана һазра баахн күүкн мана отг-әәмгиг хортнас харсад, әмән өгсн йовдл кен-негнднь үлгүр-үзмҗ болҗ, мана келн-улсин хоорндк иньгллтиг улм батрах болтха! Тадн бийстн, тана ачнр-зеенр, җичнр чигн мана таңһчд гиичд ирҗәтн», – гиҗ эн һардач халучрхҗ келснь гиичнрин седклинь йосндан үүмүлв яһв...
Иигәд найн шаху җил хооран болсн ирлцңгү йовдл эндр башкир болн хальмг улсиг хамцулҗ, сән нәәҗнр болсн залһлдаг улм батрулснь лавта.

ШАГҖИН Любовь
Зургт: бумблв секлһнә кем

Видео