Ач-тусинь темдглҗ өөдәнәр ачлв

10-06-2023, 09:15 | Общество

Элст балһснд социальн көдләчин сән өдрт нерәдгдсн байрин хург шидр болв. Терүнд социальн халхин делгрлтд тәвцән орулсн ветеранмуд, баһ тетквртә, җирһлин күнд бәәдлд туссн, һанцарн бәәдг, гемтә-шалтгта улст дөңгән күргҗәдг көдләчнр цуглрв. Байрин хургт Хальмг Таңһчин залврин Ахлач Босхмҗин Гилән, Хальмг Таңһчин Улсин Хуралын (Парламентин) Ахлач Анатолий Козачко, ЮФО-д Әрәсән Президентин күцц зөвтә элчин аппаратын федеральн инспектор Александр Беляев орлцв. Хургин эклцәр Әрәсән күч-көлснә болн социальн харслтын министр Антон Котяковин илгәсн йөрәл олнд күргҗ үзүлв. Таңһчин социальн делгрлтин, күч-көлснә болн көдлмшәр тетклһнә министерствин көдләчнр Манҗин Аркадин «Менд» гидг ду дуулад, үр-иньгин таал тогтав.

Премьер-министр Хальмг Таңһчин Толһачин болн залврин нерн деерәс социальн көдләчнриг йөрәһәд, тана үүлдвриг көдлмш гиҗ нерәдҗ болшго, хамгин түрүнд энтн тана җирһлин һол керг болна гив. Социальн көдләчнр өнчн-өвү, һанцарн бәәдг медәтнрт, олн үртә өрк-бүлмүдт, көдлмш уга үлдсн улст дөң-тусан күргҗ, эднә җирһлин таал ясрулҗ түрүн дуудврар күрәд ирдг нөкднр болҗахиг Гилян Герасимовна темдглв. Давсн җилд таңһчин Толһачин седвәрәр болн парламентин депутатнрин дөңгәр «Хальмг Таңһчин әмтнә социальн харслтын ачта көдләч» гидг өөдән нерн зүүлһхин туск шиидвр авгдв. Таңһчин социальн делгрлтин, күч-көлснә болн көдлмшәр тетклһнә министесртвин әңгин һардач Лиҗ-Һәрән Галина, Яшалтан района КЦСОН-а социальн көдләч Нормина Галина болн Сарпан психоневрологическ гер-интернатын һардач Манҗин Анатолий эн өөдән нер зүүсн түрүн һурвн күн болв.
Сән авъяст тохрсар сән өдрин байрла ирлцүлҗ олн җилдән үнн-чик седклтәһәр көдлҗ, олнд үлгүр-үзмҗ болдг көдләчнрин ач-тус темдглнә. Тиигәд, социальн халхд олн җилин эргцд көдлҗ йовх кесг күүнд ачлвр бәрүлҗ өггдснь үүрмүдтнь бахмҗ болв. Әрәсән күч-көлснә болн социальн харслтын министерствин Күндллһнә һашгар болн Ханлтын бичгәр хөрн шаху күн ачлгдв. Тер мет Хальмг Таңһчин Улсин Хуралын Дипломар, парламентин Ахлачин Ханлтын бичгәр, таңһчин правительствин Күндллһнә һашгар бас кесг күүнә ач-тус темдглв. Цуһар эдн өр-өвч седклтә, көдлмшән даавртаһар күцәдг, эднә хәләврт бәәдг улст килмҗән тусхаҗ үүлддг улс болҗахин тускар хургт келгдв. Эднә бүлән үг болн килмҗ медәтнрт, гемтә-шалтгта улст ик урмд өгч, җирһлднь учрсн күнд бәәдлд даргдлго олна хормад багтҗ бәәхд туслна.
Хальмг Таңһчин залврин Ахлачин дарук– таңһчин социальн делгрлтин, күч-көлснә болн көдлмшәр тетклһнә министр Өлзәтин Марина йөрәлин үгдән хамгин түрүнд күндтә ветеранмудт ханлтан өргв. Эндр мана таңһчд социальн халхд күсдундур миңһн күн көдлнә, социальн бүрдәцст өдгә цага сән таал тогталһна төр хаһлгдҗана, келн-улсин төсвин медлд шин объектс тосхгдҗана. Медәтә улс ут нас наслҗ, эрүл-мендән батрулхин, тааста кергәрн соньмсхин төлә таал тогталһна, көдлмшәр тетклһнә туст өдгә цага эв-арһс өргәр олзлҗ шаңһа туслмҗ күрглһнә керг-үүлдврмүд күцәх зура бәәнә гиҗ Марина Петровна темдглв.
Байрин хургт орлцачнрт «Өөрднр», «Тюльпанчик», «Веселая карусель» коллективс, нертә дуучнр Һәрән Лиҗ, Мерген Ким, Брюгидика Айса билг-эрдмән үзүлҗ, эднә седкл байсав.

ДООҖАН Наталья
ЗУРГТ: байрин хургин кем

Видео