«Алтн» ансамблин күцәмҗ

10-06-2023, 09:25 | Общество

Мөчн сарин 1-әс авн 5 күртл Сарпуль балһснд «Цугәрәсән сурһульчнрин хавр» нертә түрүн наадм болв. «Движение первых» баһчудын җисән, Сарпулин крайин Залвр болн Әрәсән баһчудын ниицән керг-үүлдвриг бүрдәв.

Әрәсән 65 регионас миңһн һар күг ирв. Тер тоод ДНР-ин болн ЛНР-ин элчнр бас орв. Хальмг Таңһчас «Алтн» бичкдүдин ансамбль болн Очра Номтын нертә Элстин 8-ч тойгта дунд сурһулин дуучнрин баг орлцв.
Оютн бәәсн цагтан ирлцңгү керг-үүлдврт орлцсн биләв. Тегәд даавртаһар белдҗ, өдгә цагин бииһән үзүлвидн. Финалд тусхларн теңкән уга байрлвидн. Темдглхд, өдгә цагин хореографин халхар мана таңһч түрүн болҗ иим күцәмҗ бәрв, гиҗ «Алтн» ансамблин һардач Наталья Нарин-Шаринова келв.
«Движение первых» җисәнә региональн Хүүвин һардач Саглр Анханован келсәр, эн наадм җил болһн давулгдхмн. Бидн болхла региональн чинртә ирлцңгү керг-үүлдврмүдиг бүрдәхәр зуралҗанавидн. Иим керг-үүлдврмүдин йовудт Хальмг Таңһчин билгтә баһчуд өөрхн таньлдад, негдәд бәәхмн, гиҗ Саглр Вячеславовна темдглв.
«Алтн» ансамбльд орлцачнр Амина Нимгирова болн Ангира Бичкебенова иим наадмд орлцсндан байрта бәәнә. Күүкдин келсәр, наадмин жюрин ханьд нертә хореографмуд орҗ, теднә бииһинь хәләҗ, шинҗлҗ, эндүһинь зааҗ келв. Эннь йир үнтәд тоолгддг.
Эн җил өдгә цагин хореографин халхар цааранднь көдлхәр зүткҗәнәвидн, ирх җилд тиим наадмд дәкәд чигн орлцад бәәхвидн, гиҗ Наталья Нарин-Шаринова ашлв.

ОЛЬДАН Цаһан

Видео