Ахнр-дүүнр болгч улс

15-06-2023, 09:10 | Общество

Урдк долан хонгт Хальмг Таңһчин Толһач Хаска Бату Әрәсәд Моңһл орн-нутгин элч Улзийсайхан Энхтувшинлә харһсн билә.

Ик кезәнәс авн хальмг болн моңһл улс ахнр-дүүнр болад бәәһә. Хамцу төсвсин болн нөкцлтин тускар Моңһлын элчлә күүндвидн. Тер тоод Хальмг Таңһчин болн Моңһлын хоорнд зуульчллһна, сойлын коллективсәрн сольлцҗ, Моңһлын оютнр мана Хальмг ик сурһульд сурлһна тускар үгцвидн. Тер мет моңһлын спортсменмүд таңһчин байрин олн нәәрт бас ирҗ орлцҗ чадхмн, гиҗ Бату Сергеевич келв.
Харһлтын йовудт селәнә эдл-ахун халхд онц оньг өггдв. Эндр хальмг тохма малыг Моңһлд бас өскчәнә. Моңһлын фермермүд дамшлтарн хувалцҗ, тер мет Хальмг ик сурһульд ирҗ, хальмг тохма малын селекцин болн генетикин халхар күцәҗәх көдлмшиг хәләхәр зуралҗана.
Хальмг болн моңһл улс шар шаҗнд шүтдг, тегәд 2024-ч җилд мана таңһчд болх нарт-делкән форумд ирхин туст Моңһлын элч Улзийсайхан Энхтувшинд таңһчин Толһач Хаска Бату үрвр кев.

ОЛЬДАН Цаһан

Видео