Суңһврин өдр заагдв

15-06-2023, 09:15 | Общество

Мөчн сарин 9-д Хальмг Таңһчин Улсин Хуралын (Парламентин) дарани сессь болв. Терүнд ут тоодан хөрн тавн төр хәләгдв. Таңһчин парламентин Ахлач Анатолий Козачкон һардврт болсн сүүрт Хальмг Таңһчин залврин Ахлач Босхмҗин Гилән, ЮФО-д Әрәсән Президентин күцц зөвтә элчин аппаратын федеральн инспектор Александр Беляев, таңһчин министерствс-ведомствсин һардачнр, зөв-йосна болн зарһин органмудын элчнр орлцв.

Сүүрин эклцд Анатолий Васильевич депутат Лиҗин Дорҗиг һарсн өдрләнь йөрәв. Дарунь депутатнр Сулука Викториг, Муутла Николайиг болн Германа Сергейиг ниицлтин зарһчнрин үүлд батлв. Эн җил моһа сард таңһчин Улсин Хуралын доладгч хуралтын депутатнрин суңһвр давулхин төлә нег мандатн суңһврин округудын шин диг-даран батлгдсн билә. Таңһчин Суңһврин комиссин Ахлачин дарук Эрднин Батр тер заканд сольвр оруллһна тускар депутатнрт цәәлһвр өгч, Баһ Дөрвдә района Плодовитое селән Сарпан района муниципальн бүрдәцин меҗәлә эс хәрлцҗәхәс иштә 14-ч суңһврин округд сольвр орулх кергтә гив. Тиигәд Ханатинск болн Плодовитненск селәдин муниципальн бүрдәцсиг ормарнь сольх кергтә болҗана. Депутатнр суңһврин комиссин Ахлачин дарукд хәләгдсн төрәр сурвр өгч цәәлһвр авсна хөөн сольвр орулх болв.
Намртан болх суңһврт нерәдгдсн хойр төр эн сүүрт хәләгдв. Тиигәд, таңһчин Улсин Хуралын доладгч хуралтын депутатнриг суңһлһна өдр сессьт батлгдв. «Хальмг Таңһчин Улсин Хуралын (Парламентин) депутатнриг суңһлһна туск» гидг таңһчин заканла ирлцәтәһәр чинртә эн керг-үүлдвр һаха сарин 10-д болхмн. Келхд, эн өдр мана орн-нутгт негдсн суңһврин өдр болҗ зарлгдв.
2022-ч җилин таңһчин бюджет күцәлһнә тускар Хальмг Таңһчин залврин Ахлачин негдгч дарук–таңһчин финансин министр Шуурһчин Очр тодрха илдкл кев. Дааврта һардачин темдглсәр, нарт-делкәд экономическ күнд бәәдл тогтсна болн санкцс зарлгдсна ашт цуг халхин бюджет күцәлһн амр биш таалд давв. Алвна болн алвна биш оруһин кемҗән 35,8 процент тогтав, эннь 2021-ч җиллә дүңцүлхлә 16330,62 миңһн арслңд баһ болв. Зуг тер бийнь таңһчин бюджет 7 процентд эс гиҗ 715 сай арслңд өсв. Аштнь нидн таңһчин бюджетин оруһин әңг 24223219858,68 арслң, һаруһин әңгнь болхла 25115464991,33 арслң тогтав. Авъяст тохрсар таңһчин бюджет социальн чинртә болҗ, сурһуль-эрдмин, эрүлменд харлһна, социальн теткврин болн келн-улсин экономикин төрмүдт ик оньг өггдв. Социальн дөң күрглһнд ут тоодан 3,5 җува арслң олзлгдв, таңһчд бәәдг улсин 50 процентнь олн зүсн демин мөңг, социальн туслмҗ авна. Таңһчд шаңһа 22 көтлврин керг-үүлдврмүд күцәлһнд бюджетәс 24415805,7 миңһн арслң һарһгдв. Тер мет 35 региональн төсвс күцәлһнд таңһчин бюджетәс 5502247,4 миңһн арслң йилһгдв. Таңһчд «Эрүлменд харлһн», «Сурһуль-эрдм», «Әәмшг уга болн сән чинртә хаалһс», «Демографь» гидг келн-улсин төсвсин медлд аһу ик көдлмш күцәгдв, шин объектс тосхгдв, бат ясврин көдлмш кегдв, сән таал тогтагдв.
Давсн җилд эрк биш медицинск даатхлһна саңгин бюджет ямр кевәр күцәгдснә, эн җилин таңһчин бюджетд сольвр оруллһна, һазрин хәрлцә дигллһнә, шаңһа үүл дааҗадг улсин болн нань чигн төрмүд сүүрт хәләгдв. Энүнәс нань таңһчин вице-премьер– таңһчин социальн делгрлтин, күч-көлснә болн көдлмшәр тетклһнә министр Өлзәтин Марина «Төрскән харсачнр» гидг шаңһа саңгин региональн әңг секлһнә туст күцәгдсн көдлмшин тускар зәңглв.

ДООҖАН Наталья

Видео