Цугәрәсән наадмд ончрв

15-06-2023, 09:40 | Общество

Әрәсәд җилин туршарт олн-зүсн марһан болн хәләвр болна. Нег үлү баһчуд дунд медрлтә, билгтә болн һавшунынь йилһҗ, улм ясрулх күслтәһәр тедн кегднә. «Әрәсән школын хавр» гидг нертәһәр сурһульчнрин профессиональн биш үүдәлтин фестиваль болв. Орннутгт түрүн болҗ кегдҗәх эн фестиваль мөчн сарин нег шинәс авн тавн күртл болв. Давсн җил эн марһан «Оютнрин хавр» гидг фестивалин кемҗәнд болсинь әмтн тодлна. Эн җил «Түрүнксин җисән» гидг ниицәнә седвәрәр Ставропольд түрүн болҗ Цугәрәсән фестивальдан цуглрҗ ирв.

Хальмг Таңһчас сурһульчнрин билг-эрдмин эн хәләврт «Алтн» гидг йилһән сән нертә ансамбль орлцв. Наталья Нарин-Шариева һардҗах эн баг хамгин сән гисн тоод йовна. Номто Очировин нер зүүҗәх 8-ч тойгта дунд сурһулин дууна баг бас хәләврт орлцв. Владимир Музраев тер дууна багиг һардна. «Алтн» ансамбль бииһин марһанд өдгә хореографин номинацд билгән үзүләд, хойрдгч девсңгин лауреатын нер зүүв. Жюрин ханьд нертә артистнр, хореографин халхар хамгин өөдән мергҗлттә специалистнр – Егор Дружинин, Владимир Варнава, Анна Агеева, Олег Хмелев, Артур Манукян орсмн. Иим мергҗлтнрин үнллһ авснь хальмг биичнрт йир күндтә болв. Тиигчкәд өдгә цага хореографин кемҗәнд тиим өөдән үнллһ олна гисн чинртә йовдл болҗана. Әрәсән кемҗәнд өдгә цага би үзүллһнд хальмг баһ наста биичнрин түрүн күцәмҗ эннь болҗана.

ҖИРҺЛИН Кермн
Зургт: «Алтн» ансамбльд орлцачнр

Видео