Сән багшт – Алексей Бадмаевин нертә мөрә

15-06-2023, 09:55 | Общество

П. Чонкушовин нертә билг-эрдмин колледжд багшнриг болн концертмейстермүдиг урмдуллһна дәкн нег сән таал учрв. Энд таңһчин сойлын делгрлтд ик тәвцән орулсн йосна болн олна үүлдәч Алексей Урубджурович Бадмаевин нертә мөңгнә мөрә батлгдв.

Хөн сарин 25-д билг-эрдмин колледжиг төгсәҗәдг баһчудт нерәдҗ сүл хонх җиңнв. Колледжин һардач, Хальмг Таңһчин ачта артистк Лилия Эрендженова, таңһчин сойлын болн зуульчллһна министрин сойлын селвгч Герман Санджарыков баһчудыг байрта эн өдрлә йөрәһәд, җирһлин хаалһднь күцәмҗ дурдв.
Байрин эн өдр чинртә дәкн нег йовдлар тодлгдв. Алексей Бадмаевин нертә мөңгнә мөрә билг-эрдмин колледжин багш, Хальмг Таңһчин сойлын ачта көдләч Наталья Алексеевна Анчеевад бәрүлҗ өггдв.
Алексей Урубджурович Бадмаевин 100 җилин өөнлә ирлцүлҗ, П. Чонкушовин нертә билг-эрдмин колледжин багшнр болн концертмейстермүд дунд мөрән төлә марһан зарлгдсн билә. Алексей Урубджурович Бадмаев (1921-2012) – йосна болн олна нертә үүлдәч, Төрскән харсгч Алдр дәәнд орлцач, Хальмгин сойлын ачта көдләч, Хальмг Таңһчин күндтә иргн мөн. Җирһлин болн үүдәлтин хаалһнь тиим өөдән ачлврмудар темдглгдсмн. Хар Һазра района партин комитетин негдгч сегләтр, Хальмг АССР-ин сойлын министр, таңһчин Залврин ахлачин дарук – һардгч эн олн үүл дааҗ йовсн цагтан Алексей Урубджурович Бадмаев таңһчин делгрлтин төлә цуцрлтан уга үүлдҗ йовсмн.
Хальмгт сойл делгрүллһнд, медрлтә болн сурһульта мергҗлтнр белдлһнд министр көдлҗәхдән, Залврин ахлачин дарук болҗ үүлдҗәхдән ик килмҗ һарһҗ йовснь цаарандк делгрлтин ул-сүүринь тәвсмн. Гүн медрлтә, сән белдвртә болн цецн ухата эн күн зөргтә ишкдл кехдән әәдго бәәсмн. Хальмг АССР-ин сойлын делгрлтин тодрха зура белдәд, РСФСР-ин сойлын министр А. Поповд тер зураһан орулҗ өгәд цәәлһәд, Элстд көгҗмин училищ секх кергтә гиҗ медүлсмн. Хөөннь материальн-техническ көрң батрад ирхлә сойлын-гегән-герлин училищ секх күсл тәвҗәсмн. Эн седвәринь дөңнснә ашт Саратовск консерваторин һардач Лев Львович Христиансен Элстд көгҗмин училищ секлһнд туслсмн.
Таңһчин делгрлтин төлә насн-җирһлән нерәдсн эцкиннь санлд нерәдәд, өрк-бүлнь, үрднь Алексей Бадмаевин нертә мөңгнә мөрә тогтасмн. Эн мөрә билг-эрдмин колледжин багшнр болн концертмейстермүд дунд марһа зарлад, җил болһн ашнь диглгднә. Хамгин сән күцәмҗ бәрҗ үүлдсн, сән оютнр белдсн багшнриг болн концертмейстермүдиг йилһҗ, тедниг урмдуллһна күслтәһәр эн марһан бүрдәгднә. 2022-ч җилд түрүн болҗ Алексей Бадмаевин нертә мөрәһәр багш, Хальмг Таңһчин сойлын ачта көдләч Кермен Валентиновна Олязаева ачлгдсн билә.
Эн җилин хөн сарин 25-д болсн байрт орлцхар билг-эрдмин колледжд Алексей Урубджурович Бадмаевин күүкнь Амуланга болн көвүднь Бадма болн Баатр ирснә тускар колледжин багш О. Нижебовская зәңглв. Амуланга Алексеевна эцкиннь кергиг цааранднь делгрүләд, таңһчин сойлын министр болҗ 2013-2015-ч җилмүдт көдлҗ йовла. Ода Амуланга Учурова «Архангельское» гидг шаңһа музей-заповедникин федеральн шаңһа бюджетн бүрдәцин һардачин дарук болҗ көдлҗәнә. Мергҗлттә болн сән белдвртә күн болад, сойлын делгрлтин халхар федеральн кемҗәнд Амуланга Учурова күцәмҗтәһәр көдлҗ йовна.
Алексей Урубджурович Бадмаевин нериг мөңкрүлхәр кеҗәх, сойлын халхар сән белдвртә мергҗлтнр белдлһәр йосна болн олна эн үүлдәч кеҗ йовсн көдлмшинь үнлҗ иим мөрә тогтаснь ик чинртә йовдл гиҗ темдглх кергтә. Кеҗ йовсн кергнь цааранднь делгрлт авад йовхла төрскнч седклтә эн күүнә нернь мартгдшго.

ҖИРҺЛИН Кермн

Видео