Кесг регионмудла чинртә бооцас батлгдв

17-06-2023, 09:00 | Общество

Санкт-Петербург балһснд 2023-ч җилин экономическ нарт-делкән хург болв. Тенд Хальмг Таңһчин һардврин, Залврин элчнр орлцв. Экономикин, шин технологин, социальн болн талдан төрмүд керг-үүлдврин йовудт хаһлгдв. ПМЭФ-т орлцад, эврәннь төсвсән үзүләд, терүнәс нань Әрәсән шин регионмудла нөкцлтән батрулдг эв-арһ учрв.

Эн җил мана таңһч түрүн болҗ эврәннь региона туск стенд белдҗ ПМЭФ-ин йовудт үзүлв. Тернь учрта, юңгад гихлә сүл җилмүдт Хальмг Таңһчин тууҗар, сойлар, авг-бәрцәр олн зуульчнр соньмсҗана.
Хургин йовудт Хальмг Таңһч Әрәсән кесг регионмудла чинртә бооцас батлв. Донецк Улсин Республиклә өөрдлүлһнә көдлмшиг шунмһадулҗ, тер мет көлгнә, зәңгллһнә залһлдана, АПК-н, тосхлтын халхар нөкцлтин бооца батлсн болдг. Селәнә эдл-ахун халхар болхла хальмг тохма малыг ДНР-т хулдҗ, тендәс болхла ичмә, цаһан буудя, эрднь ишшә авч ирәд, малын хот белдхин төлә олзлгдх болв.
Тамбовск мүҗлә батлсн бооцана йовудт промышленностин, сойлын, номин, зуульчллһна, өдгә цагин технологин, эрүл-менд харлһна, спортивн болн баһчудын политикин халхар олн төсвсиг хамдан күцәхмн
Сбербанкин өмн-барун үзгин әңг болн Газпромбанк Хальмг Таңһчин бизнес делгрүллһнд тусан күргхмн. То-дигин технологин халхар төсвс күцәлһнд бас нөкцлтх болҗ һарв.
«Тегпродакшн» ООО-ла батлсн бооцаһар таңһчин Үстин районд цецгүд урһадг теплиц тосхгдхмн. Эн төсв күцәлһнд 2 тербум шаху арслң йилһгдхмн. Урһасн цецгүд Әрәсән регионмудт хулдхар зуралгдҗана.
«Лебеди-Агро» ООО Октябрьск районд тутрһин комплекс тосхлһнд дөңгән күргхмн. Эн төсвд 14 тербум арслң йилһхәр белн бәәхән медүлв.
Москва балһсна Залврла бас чинртә бооцан батлгдв. Энүнә йовудт Хальмг Таңһчин Толһач Хаска Бату болн Москва балһсна мэр Сергей Собянин хулд-гүүлгәнә, номин-техническ, сойлын, зуульчллһна, спортын, көлгнә, йиртмҗин бәәдл харлһна халхар нөкцлтхәр үгцв.
«ВДНХ» АО-ла нөкцлтин меморандум батлгдв. Москван бәәрн улс болн гиичнр бүрдәгдсн һәәхүлмүдт Хальмг Таңһчин сойлла өөрхнәр таньлдҗ чадхмн.
Шанхайск бүрдәцлә нөкцлтин бооцан бас батлгдв. Темдглхд, бүрдәцин ханьд Әрәсән орн-нутг бәәтхә, Казахстан, Узбекистан, Кыргызстан, Таджикистан болн талдан орн-нутгуд орна. Эрүл-менд харлһна, спортын, то-дигин технологин, сурһуль-эрдмин халхар дамшлтарн хувалцдг эв-арһ учрхмн.
Урдк җилд Хальмг Таңһчин болн Алтан крайин хоорнд хулд-гүүлгәнә, номин-техническ болн сойлын халхар бооцан батлгдсн билә. ПМЭФ-2023 йовудт хальмг тохма малыг болн генетическ тоотыг Алтад йовулхар толһачнр үгцсн билә. Мана таңһч болхла эн регионд кеҗ һарһдг селәнә эдл-ахун көлгәр соньмсв.
Запорожск мүҗлә бооцан батлгдҗ, регионмуд хоорндк экономическ хәрлцәнә, хулд-гүүлгәнә, сойлын болн талдан халхар залһлдан мана таңһчла батрулгдхмн.
Севастополь балһсн мана таңһчла нөкцлтхәр ирлцңгү бооца бас батлв. Келхд, эн җилин хаврар Севастополь балһсна делегац мана таңһчур ирҗ, инвестицин төсвс күцәхин төлә дамшлтарн хувалцсн болдг.
Эндр Петербургск экономическ нарт-делкән ик хург төгсәд, ашнь диглгдхмн. Энүнә тускар дарани тойгт зәңглхвидн.

ОЛЬДАН Цаһан

Видео