Эрүл-мендин бәәдлиг харлһна халхар көдлнә

17-06-2023, 09:10 | Общество

Маңһдур мана орн-нутгт эрүл-менд харлһна көдләчин Өдр темдглхмн. Күн болһн төрснәсн авн җирһлиннь туршарт эмчнрин болн дунд медицинск көдләчнрин хәләврт бәәдг. Ямр нег шарх һархла, гем учрхла бидн хамгин түрүнд эдн тал адһҗ, килмҗтә эмнлһинь авнавидн, тегәд чигн эн сән өдрлә эрүл-менд харлһна көдләчнрт ханлтан өргхәр шуннавидн.

Эрүл-менд харлһна көдләчин эрдмиг шүүҗ авсн күн өр-өвч седклтә, цаһан саната, тесвртә болх зөвтә. Эднә көдлмш амр биш, ик дааврта болн өөдән чинртә болна. Һурвн җил хооран учрсн әәмшгтә гем эмчнрин көдлмш ямаран ик дааврта болҗахиг медүлв. Хальдврта гемәс хөрлһнә күнд кергт кесг күн орлцҗ, залу-зөрмгән үзүлв, зәрмснь гемтә улст дөңгән күргәд эврәннь әмән чигн өгв. Ода шишлң цергә керг-үүлдвр болҗадг цагла эрүл-менд харлһна көдләчнр шарх-шав авсн улст дөңгән күргҗ бас бачм бәәдлд көдлҗәнә. Мана таңһчин эмчнр талдан регионмудын элчнрлә хамдан дәәнә һалвд салдсмудын әм аврлһнд церглҗ йовхнь үлгүрлгч йовдл болҗана.
Сән өдр угтҗ таңһчин эмнлһст олн җилдән эрүл-менд харлһна халхар көдлҗ йовх улсин ач-тус темдглҗ, ветеранмудтан ханлтан өргҗ, байрин хург давулв. П.Жемчуевин нертә Таңһчин эмнлһнд болсн байрин хург эрүл-менд харлһна көдләчин Өдрт болн клинико-диагностическ лабораторин (КДЛ) 70 җилин өөнд нерәдгдв. Хальмг Таңһчин Толһачин һардврин һардачин дарук Савар Тарбаев, таңһчин Улсин Хуралын (Парламентин) Ахлачин дарук Сергей Сухинин, таңһчин эрүл-менд харлһна министр Булат Сараев болн нань чигн күндтә гиичнр эмнлһнә көдләчнриг йөрәхәр ирв. Цуһар эдн эрүл-менд харлһна көдләчин эрдмин чинрин тускар келәд, эднә гүн медрл, килмҗ болн бүлән үг дарунь эдгхд туслдгиг темдглв.
Таңһчин эмнлһнә ах эмч Александр Калаев хамдан көдлҗәдг үүрмүдән сән өдрин байрла йөрәһәд, бат эрүл-менд дурдв. Авъяст тохрсар сән өдрлә ирлцүләд олн җилдән үнн-чик седклтәһәр көдлҗ, үүрмүдтән үлгүр-үзмҗ болҗадг, баахн селгә белдҗ байн дамшлтарн хувалцҗадг көдләчнрт өөдән ачлвр бәрүлҗ өггдв. Тиигәд, эрүлменд харлһна ветеранмуд Галина Китляева, Наталья Гонцукова, Валентина Белоконева болн Мария Манджиева «Хальмг Таңһчин эрүл-менд харлһна делгрлтд тәвцән орулсн төләдән» гидг темдгәр ачлгдв. Әрәсән эрүл-менд харлһна министрин Күндллһнә һашгар, таңһчин Улсин Хуралын (Парламентин) Ахлачин Ханлтын бичгәр, таңһчин эрүл-менд харлһна министерствин Күндллһнә һашгар эмнлһнә кесг эмчнрин болн дунд медицинск, нань чигн көдләчнрин күч-көлсн үнлгдҗ темдглгдв.
Байрин хургт 70 җилин өөнән темдглҗәх шинҗллтин лабораторин көдләчнрт онц йөрәлин үг нерәдгдв. 1953-ч җилин зунар таңһчин эмнлһнд түрүн болҗ лаборантын кабинет секгдсмн. Тер күнд цагла кабинетд зуг микроскоп шинҗллт келһнд олзлгддг бәәсн болхла эндр лабораторьт өдгә цага шин кергсл бәәнә. Әңгиг Әрәсән эрүл-менд харлһна йилһән сән көдләч, клиническ лабораторн шинҗллтин өөдән мергҗлттә эмч Инга Кукаева һардна. Лабораторьт олн зүсн шинҗллт кегднә, лабораторн зәңгллһнә диг-даран орулгдсн бәәнә, өдгә цага эв-арһс өргнәр олзлгдна. Тер мет КДЛ таңһчин талдан эмнлһсин лабораторьмудт методическ дөң күргҗ, дамшлтарн хувалцна. Байрин хургт лабораторьт көдлҗ йовсн болн эндр энд үүлдҗәдг 22 күн ачлгдв.
Шишлң цергә керг-үүлдвр эклснәс авн мана таңһчин элчнр терүнд орлцҗ, залу-зөрмгән үзүлҗ даавртаһар церглҗ йовна. Таңһчин эмнлһнә көдләчнр дунд өөрхн улснь бас церглҗ йовна. Елена Пахомован, Марина Эрдниеван, Наталья Евстратенкон болн Надежда Курмангазиеван көвүд, Кирилл, Евгений, Алексей болн Кайрат, цергә даалһвран күцәҗ йовна, тегәд эдниг дөңнҗ бүлән үг бас онц нерәдгдв. Таңһчин эмнлһнә көдләчнриг йөрәхәр нертә артистнр болн үүдәгч коллективс ирҗ, билг-эрдмәрн эдниг байрлулв.
Өцклдүр Элстд эрүл-менд харлһна көдләчин Өдрт нерәдгдсн байрин хург болв. Терүнд таңһчин эмнлһсин сән гисн көдләчнр, эрүл-менд харлһна халхар олн җилдән көдлҗ йовх эмчнрин болн медицинск эгчнрин ач-тус өөдән ачлврмудар темдглгдв. Энүнә тускар даруһас барлгдхмн.

ДООҖАН Наталья
ЗУРГТ: П.Жемчуевин нертә таңһчин эмнлһнә шинҗллтин лабораторин көдләчнр (Эн төрәр 4-ч халхд бас умштн)

Видео