«Цугнь диилврин төлә»

17-06-2023, 09:15 | Общество

Урҗ өдр мана таңһчд «Цугнь диилврин төлә» нертә буйнч седклин телемарафон хойрдад давулгдв. Эн керг-үүлдвриг Улсин фронт болн Хальмг келн-улсин телеүзл бүрдәв.

Телемарафон шуд залһлдана эв-арһар давв. Энүнә йовудт таңһчин иргн болһнд дөңгән күргх арһ учрв. Шуд залһлдан дөрвн частан болсмн. Нааран таңһчин һардврин, шаҗна, Төрскән харсгч Алдр дәәнә ветеранмуд, олн бүрдәцин элчнр, шишлң цергә керг-үүлдврт орлцачнр, волонтермуд ирҗ орлцв.
Хальмг Таңһчин Залврин һардачин дарук, социальн делгрлтин, күч-көлснә болн көдлмшәр тетклһнә министр Марина Ользятиева СВО-д орлцачнрин өрк-бүлмүдтнь ямаран шаңһа дөң күргҗәхин тускар келҗ өгв. Тер мет шишлң цергә керг-үүлдврт орлцҗадг нег һазра улст ханлтан өргҗ, гертән эрүл-менд ирхиг дурдв.
Таңһчин МВД-н полковник Нина Чокаеван келсәр, шишлң цергә керг-үүлдврт орлцҗадг нег һазра мана улсин төлә дөң-тусан күргҗәдг болна. Эндр бидн теднд бүлән үгән нерәдҗ, цуһар ниитә бәәҗ, цуг таласнь дөңнх зөвтәвидн гив.
Төрскән харсгч Алдр дәәнә ветеран Петр Леонтьев күнд цагин тодлврарн хувалцҗ, СВО-д орлцачнриг дөңнҗәхән медүлв. Өдгә цагт шин технологин эв-арһс олн, тегәд диилврин төлә цуг тоот бәәнә, гиҗ Петр Леонтьевич келв.
Түрүн зергләнд йовх мана ахнр-дүүнр нег һазра улсин дөңгиг үнлҗ, даңгин ханлтта бәәнә. Квадрокоптермүд, тепловизормуд, талдан кергсл цергә күслән күцәхд туслна, гиҗ Улсин Фронтын хальмг әңгин һардач Баатр Мергульчиев темдглв.
Дөрвн шаху часин туршарт таңһчин олна кесг үүлдәчнр шишлң цергә керг-үүлдврт орлцачнриг дөңнҗ, ухан-тоолврарн хувалцв. «Цугнь диилврин төлә» буйнч седклин телемарафона йовудт хурагдсн мөңгәр, СВО-д орлцачнрин төлә шишлң кергсл, хувц-хунр, эм, хот-хол болн нань чигн тоот хулдҗ авгдад илгәгдхмн.

КАРСАНА Евгения

Видео