Нертә заводын әңг секгдхмн

17-06-2023, 09:20 | Общество

Шидр Белоруссин Минск балһснд «Белагро-2023» нартделкән селәнә эдл-ахун XXXIII шишлң һәәхүл давсна тускар зәңглләвидн. Керг-үүлдврт Белоруссин селәнә эдл-ахун мергҗлтнр, көдләчнр бәәтхә, нарт-делкән арвн орн-нутгин, тер мет Әрәсән арвн дөрвн региона элчнр бас орлцв.

Һәәхүлин йовудт өдгә цагин некврлә ирлцҗәдг селәнә эдл-ахун техник үзүлгдв. Терүнәс нань ирлцңгү конференцс, семинармуд, презентацс давулгдв, яарм болн сойлын багмудын концерт болв.
Темдглхд, Хальмг Таңһчин селәнә эдл-ахун министерствин элчнр «Белагро-2023» нарт-делкән һәәхүлд бас орлцв. Энүнә йовудт мана таңһчин болн Минск балһсна тракторн заводын хоорнд бооцан батлгдсн билә.
Хальмг Таңһчин селәнә эдл-ахун министрин үүлиг цаг зуур дааҗадг Тимур Гаваевин келсәр, «МТЗ» АО-ла батлсн бооцана йовудт мана таңһчд селәнә эдл-ахун делгрүллһнд нөкцлтин халхар үүлдврән улм шунмһадулҗ йовхмн. Тер мет селәнә эдл-ахун эдл-ууш кеҗ һарһдг арһлачнрт көдлмшән бас делгрүлх кергтә, гиҗ Тимур Сергеевич темдглв.
Мана регионд селәнә эдл-ахун көлгнә паркд 3,5 миңһн трактор орна, терүнәс 70 процентнь BELARUS тамһта трактор болна. Таңһчин АПК-н көдләчнр җил болһн «МТЗ-н» 60 шаху трактор хулдҗ авна.
Онц темдглхд, батлгдсн бооцана нилчәр «МТЗ» АО Хальмг Таңһчд эврәннь дилерск төв секхмн. Мана таңһчд трактормуд, селәнә эдл-ахун техник болн көлгнә ясврт кергтә төмр тоот хулдгдхмн. Эннь йир чинртә йовдл гиҗ келх кергтә. Урднь эвдсн трактормуд болн техник хам-хоша бәәдг регионмудт авч одад ясврт өгх кергтә билә. Удл уга иим көдлмш дор ормдан күцәгдхмн, гиҗ Тимур Сергеевич иткүлв.

ОЛЬДАН Цаһан

Видео