Бичкдүдт саатулын дууһан дуулҗ…

17-06-2023, 09:25 | Общество

Күсдундур җил хооран Москвад Манҗин Аркадин өөнә концертин йовудт баахн эк Аюна Мазурова нертә көгҗмч тал өөрдҗ соньн төсв бүрдәх санаһан медүлв. Аркадий Наминович оньган өгч соңсад, Аюнала нөкцлтхәр зөвән өгв.

Шидр «Калмыкия» РИА-н барин төвд соньн төсвин тускар брифинг болв. Сүл җилмүдт хальмг кел делгрүллһнә төр хамгин бачм керг болҗахинь цуһар меднә. Баһчуд келән дасхин төлә олн эв-арһ олзлна. Баахн бер Аюна Мазурован келсәр, үрдән нилх цагаснь төрскн келнд орулх кергтә. Мел эн саамд саатулын дуд туслхмн, гиҗ Аюна тоолврарн хувалцв. Үрән унтулсн цагт 20-30 минутд саатулын дууһан дуулад бәәхлә бичкн төрскн келән соңсҗ, чееҗдән шингәҗ медҗ өсхмн. Тиигәд А.Мазурова хальмг билгтнрин шүлгүд, амн үгин зөөрин үүдәврмүд цуглулҗ, саатулын дуд үүдәхәр шиидв. Кесг дуунд Манҗин Аркадь айсинь орулв. Харм төрхд, урдк җилин хөн сард нертә көгҗмч сәәһән хәәһәд төсвиг күццднь күцәҗ чадсн уга.
Хөөннь Аюна Мазурова Хальмг Таңһчин ачта артистк Диана Босхомджиевад эврә керг-төрән келв, нөкд болхиг сурв. Диана Аюнаг дөңнҗ нертә дууч, көгҗмч Элистина Бурвяшовала таньлдулв. Элистина хойр саатулын дуунд айсинь үүдәв, негнднь үгмүдинь чигн бичв, хойрдгчднь Аюна эврән үгинь бичсн болдг.
Бидн Аюнала Москва балһснд харһад, эн нанд саатулын хойр ду үзүлв. Нег дууна көгҗмнь уга бәәҗ. Тиигхлә би экдән үгмүдинь үзүләд, экм көгҗмч болсн төләдән айсинь бичхәр зөвән өгв. Тегәд саатулын дууг би бас дуулдг болув, гиҗ дууч Җирһл Дорджиева келв.
Хальмг кел делгрүллһнә Төвин һардачин үүлиг цаг зуур дааҗадг Төрбатан Очрин келсәр, эн төсв күцәлһнд ик көдлмш кегдв. Баһчуд негдәд, нег-негән дөңнәд, хамцу төсвән күцәв.
«Саатулын дуд» хураңһу шидр барас һарв. Мөчн сарин 22-т драмин болн шог наадна Орс театрт шин хураңһун презентац болхмн. Таңһчин улс тиигәрән одҗ, соньн дегтр хулдҗ авч чадхмн.

КАРСАНА Евгения

Видео