Суңһвр дигтә-даратаһар давхин төлә

17-06-2023, 09:30 | Общество

Эн җилин намрар Хальмг Таңһчин Улсин Хуралын (Парламентин) депутатнрин суңһвр болхмн. Эн дааврта кергүүлдвр дигтә-даратаһар болн заканла ирлцәтәһәр давхин төлә ик эртәснь белдврин көдлмш эклв. Шидр Хальмг Таңһчин Олна палатд дууһан өглһнә кергиг шинҗллһнә олна штаб эклҗ үүлдв. Терүнә ханьд Олна палатын гешүд, юристнр болн шинҗләчнр орв. Штабин үүлдврин тускар Олна палатын хүүвин селвлцәнд күүндвр болв.

Дууһан өглһиг шинҗллһнә олна штаб энтн Әрәсән Олна палатын төсв болна, тегәд суңһвр болх регионмудт эн үүлдврән эклҗәнә. Таңһчин Олна палатын Ахлач Мучан Батырин келсәр, эн бийнь штабиг һардв, терүнә ханьд юристнрин, зәңгллһнә болн бачм багмуд орв. Одахн КалмГУ-н юридическ дацңгин багшнр болн суңһвр давуллһна туст баһ биш дамшлт хоршасн улс Ростов-на-Дону балһснд шишлң сурһуль сурад, мергҗлтән өөдлүлв. Эдн хөөннь суңһврин йовудын шинҗләчнрлә харһад, федеральн болн таңһчин заканд ямаран сольвр орулгдсна, дууһан өглһнә йовудыг чикәр шинҗллһнә туст цәәлһвр өгхмн.
Таңһчин Олна палатын Ахлачин дарук Раим Файзиев һурвн өдртән болсн сурһульд орлцсна тускар келәд, суңһврин туск заканд орулгдсн шинрлтс сәәнәр медх кергтә гив. Дәкәд өдгә цагт худл зәңг тархалһн нәрн төр болҗана, тегәд әмтн дунд цүүгән учршгон төлә саглулгч көдлмш күцәх кергтә. Баһчуд суңһврт шунмһаһар орлцхин төлә бас эднлә харһҗ күүндх, дууһан өглһн ик чинртә болҗахиг цәәлһх кергтә болҗана.
Олна штабин үүлдврин зура батлҗ, райодар харһлтс давулҗ суңһвр угтҗ белдврин көдлмш кехин тускар Олна палатын хүүвин гешүд шиидв. Суңһврин керг-үүлдвр боомтг угаһар өөдән кемҗәнд давх зөвтә. Партьсин болн кандидатнрин шинҗләчнр суңһврин йовудыг хәләҗ бүрткҗ чадҗана. Олна палатын медлд үүлдҗәдг дууһан өглһиг шинҗллһнә олна штабин гешүд эн дааврта керг-үүлдврт бас орлцҗ цугнь дигтә-даратаһар давхиг хәләхмн.

ДООҖАН Наталья

Видео