Ветеранд ачлвр бәрүлв

17-06-2023, 09:40 | Общество

Шидр Хальмг Таңһчин залврин Ахлачин дарук– таңһчин социальн делгрлтин, күчкөлснә болн көдлмшәр тетклһнә министр Өлзәтин Марина Төрскән харсгч Алдр дәәнд орлцач Иван Менжуевич Соваевд золһҗ одв.

Хальмг Таңһчин Толһач Хаска Батун болн Белгородск мүҗин губернатор Вячеслав Гладковин даалһврар Марина Петровна ветеранд «1943-ч җилд така сарин 12-т болсн Прохоровск бәрлдәнә 80 җилин санлд» гидг медаль бәрүлҗ өгв. Эн ачлвриг Белгородск мүҗин һардвр Курск бәрлдәнә өөнд нерәдҗ учрав.
Целинн района муниципальн бүрдәцин толһач Опин Эрднь болн Целинн хазгудын ниицәнә одмн Семена Николай ветераниг бас йөрәв. Иван Менжуевич 1925-ч җилд така сарин 3-д Әәдрхнә мүҗин Икрянинск района Маячное селәнд төрҗ һарсмн. Арвн нәәмтәдән цергт мордад Пензенск мүҗд баахн цергчнрин сурһульд йовулгдсмн. 1943-ч җилин хөн сарас авн ноха сар күртл Белгород балһс сулдхлһна бәрлдәнд орлцв, тенд шав авв. Иван Менжуевич Төрскән харсгч дәәнә II девсңгин орденәр, Курск бәрлдәнд орлцсна болн Г.Жуковин нертә медальмүдәр болн нань чигн өөдән ачлврмудар темдглгдсмн. Мана таңһчд Курск бәрлдәнд орлцсн хойр ветеран бәәнә, эннь Иван Соваев болн Тимофей Кутыгин болна. Тимофей Яковлевичд эн өдрмүдт бас ачлвринь бәрүлҗ өгхмн.

ДООҖАН Наталья

Видео