Теегин дун Москвад күңкнв

17-06-2023, 10:10 | Общество

Хальмг Таңһчин Келн-улсин оркестрин концерт Московск государственн консерваторьт болв. «Алдр теегин дун» гиҗ нерәдгдсн соньн концерт ик күцәмҗтәһәр давв.

Мөчн сарин 10-д Москва балһснд болсн концерт хальмг артистнрт кесгтән тодлгдхнь лавта. Җилин туршарт олн-зүсн керг-үүлдврмүдт орлцҗ, таңһчар йовҗ концертс тәвсн баг шунлтта үүлдврән ашлад Московск консерваторьт билгән үзүлсн йовдлын чинрнь хөөннь чигн медгдәд бәәхмн. Оркестрин художественн һардач Савр Катаевин тоолврар, өмнән оньдин үүдәгч шин төр тәвҗ көдлх кергтә. «Оркестрин үүлдвриг концертн олн тәәз деер үзүлҗ хальмг көгҗмлә талдан орн-нутгин олнәмтиг таньлдулх күслтәһәр шунҗ йовнавидн. Әрәсән хотл балһсна консерваторин Рахманиновск залд концертән үзүлх таал маднд учрв. Әрәсән алдр көгҗмчин өөнин җилд энд билг-эрдмән үзүлнә гисн ик дааврта болв. Концертын 24-ч кемән мана баг тиим үүдәгч ашлврар төгсәҗәнә», – гиҗ С.Катаев келв.
Московск консерваторин Рахманиновск залд цуглрсн олн хәләһәчнр ик оньган өгч хальмг көгҗм соңсв. Алдр баатрльг «Җаңһр» дуулврин зәрм бөлгүд эднд соңсхгдв. Әрәсән ачта артистк Данара Шалханова, Хальмг Таңһчин улсин артистк Елена Каджиева, Хальмг Таңһчин ачта артист Кутлан Мукубенов, Мингиян Ханинов, нань чигн артистнр билг-эрдмәрн хәләһәчнриг байрлулв. Хальмг артистнрин концертд күндтә гиич болҗ, нер туурсн көгҗмч Петр Чонкушовин ачнь аавиннь нериг өөдән билгәрн батлҗ йовх Петр Чонкушов ирв. Келсән күцәдг коллектив эн кемд ик күцәмҗтәһәр болн чинртәһәр көдлв. Хальмг көгҗмчнр Әрәсән келн-улсин оркестрмүдин наадмд орлцад, Кремлевск бәәшңд концертән үзүлв. Московск консерваторин Рахманиновск залд хальмг көгҗмән татҗ, хальмг дууһан дуулҗ, ашлгч концертән үзүлнә гисн цугтад ямаран ик байр болҗана.

ҖИРҺЛИН Кермн

Видео