Маңҗин Арслңгин һол мөрә

17-06-2023, 10:15 | Общество

Сочи балһснд болсн нарт-делкән наадммарһанд Элст балһсна С-Г. Дорджинә нертә 1-ч тойгта бичкдүдин көгҗмин сурһулин күүкд орлцв. «Золотая кифара Орфея» гидг нертәһәр болдг бичкдүдин болн баһчудын үүдәлтин марһанд Хальмгин сурһульчнр билгәрн ончрв. Бичкн көгҗмчнрин марһанд Манҗин Арслң һол мөрә шүүҗ авв.

Хальмг Таңһчин сойлын ачта көдләч Ольга Дмитриевна Бананован сурһульчнр эн марһанд сән белдврән үзүләд, хальмг көгҗмиг олн улст соңсхҗ чадв. Классическ үүдәврмүд наадсн деерән сурһульчнр хальмг көгҗмчнрин үүдәврмүдиг соңсулснь жюри өөдән үнлв. Арслң көгҗмин эн сурһулин зурһадгч класс төгсәһәд, доладгч класст орхмн. Олн үртә өркбүлд өссн көвүн йирин ямаран чигн кергән оньган өгч күцәмҗтәһәр кедгиг дассмн. Келхд, эднә өрк-бүлд цугтан көгҗмд дурта. Хойр эгчнь бас көгҗмин сурһуль авсмн.
– Арслң бичкнәсн авн көгҗмәр соньмсла. Би Манҗин Аркадь мет фортепианд нааднав, гиҗ келдг билә, – гиҗ экнь Анна Александровна тодлв. – Негдгч класст орснасн авн көгҗмин сурһульд чигн сурдг болв. Сул цаг учрхла мел фортепианон ард суусн бәәнә. Сурһулин кичәлд белд гихлә, би дарунь кечкләв гидмн. Хам-хоша бәәх әмтн гертән иртл би фортепианод нааднав. Тиигәд көгҗмд дурта, бийнь кинән кевәр дасна. Көгҗмин хойрдгч класст орҗахдан түрүн марһанд орлцад, хойрдгч орм эзллә. Мадн цугтан байрлад, шунлтынь дөңнәд, урмд өгнәвидн. Тер цагас авн марһан болһнд көвүн диилвр бәрәд, көгҗмд улм шүтәд, фортепианод наадлһна эрдмнь өсәд йовна.
Марһанд диилвр бәрхд юн туслна, билг кергтә эс гиҗ тиим шишлң көгҗм татх кергтә гиҗ экнь көвүнәсн нег дәкҗ сурв. Даңгин наадад бәәх кергтә. Көгҗмиг давтад, дасад бәәхлә, терүнә сәәхн болн өвәрц айлһнь эвтән тусад бәәх. Юм келго, эрдмән өөдлүллго бәәхлә, юунд чигн күрч болшго. Иим баахн көвүн көдлмшин чинриг сәәнәр медҗ авснь иргчдән энүнд йосндан ик күцәмҗ бәрхднь иткх ицл өгчәнә.
Дәкәд нег дииләчнь Баатрин Иляна мөн. Марһана йовудт эн күүкн «Көвүдин би» гидг үүдәвриг наадсинь жюри онц темдглв. Иляна көгҗмин сурһулин дөрвдгч класст сурчана, багшин заасн тоотыг дурта кевәр күцәнә.
Хальмг көгҗмч Уджан Борисин үүдәврмүдиг мана сурһульчнр тер марһанд наадад, тернь бичкдүдт диилвр авч ирснә тускар багшнь темдглв.
Нарт-делкән марһанд Манҗин Арслң «Степное озеро» гидг үүдәвриг татсмн. Теегин йиртмҗин тогтун бәәдл, нуурин өөр җиргҗәх шовудцуг әмтә тоот усна өөр сергҗ әмлҗәхнь үзгдсн болҗ медгднә, гиж эн үүдәвр яһҗ наадгдсна тускар Ольга Дмитриевна тодлҗ келв. Арслң эврә сәәхн билг-эрдмәрн теегин зурциг цуг ирсн улст, жюрин гешүдт үзүлҗ чадв. Шопена үүдәврмүдиг олн көгҗмчнр наадҗ йовна. Болв цугтан меддг тер үүдәврмүдиг наадлһна эрдмәрн талдан орлцачнрас йилһән сәәнәр күцәх кергтә. Арслң Шопена үүдәсн көгҗм наадхла жюри ик оньган өгч энүг соңсв. Уджан Борисин «Степное озеро» гидг үүдәвриг татхлань жюри эврә үнллһндән улм батрв. Арслң эн үүдәвриг татад дуусхлань залд суусн әмтн «Браво!» гиҗ шуугад, уданд ниргҗ альхан ташв, – гиҗ багш Ольга Бананова байрарн хувалцв. Уджан Борисин дәкн нег үүдәвриг, «Көвүдин би» гидг айсиг, Баатрин Иляна бас йилһән сәәнәр татад, өөдәнәр үнллгдв.
Энүнә үүдәврмүд Сочи балһснд күңкнх гиҗ Уджан Борис медҗәсн уга билә. Тенд бәәдг үр көгҗмч Юрий Мовсесянт генткн җиңнүләд, тана сурһульчнр марһанд орлцхар ирсн бәәнә гиҗ келсмн. Марһанас хәрҗ ирхләрн Ольга Дмитриевна болн сурһульчнрнь иим байрта зәңг авч ирсмн. Марһанд Ольга Бананован талдан чигн сурһульчнр орлцв. Билг-эрдмин дамшлтан хоршахд эннь теднә түрүн ишкдл болҗана, үүрмүдиннь күцәмҗ күүкдт ик урмд өгв, йоста сән үлгүр болв. Эн марһанд Элстин бичкдүдин көгҗмин сурһулин сурһульчнр хойрдгч кемдән орлцҗана. Хальмгин бичкн билгтнрин белдврнь сән болдгиг марһана бүрдәһәчнр меднә.
Иигәд мана орн-нутгт зарлгдсн багшин болн сурһмҗлачин җилд Хальмг Таңһчин сойлын ачта көдләч Ольга Дмитриевна Бананован сурһульчнр багштан тиим сән белгән нерәдв. Нарт-делкән марһанд һол болн негдгч мөрә шүүҗ авсн бичкн көгҗмчнр таңһчд көгҗмин сурһуль даслһн сән кемҗәнд бәәхинь, мергҗлттә багшнрин күцәмҗиг, келн-улсин көгҗмин делгрлтд хальмг көгҗмчнрин үүдәврмүд чигн зөвтә орман эзлҗәхинь үзүлв.

ХӨӨЧИН Галина
Зургт: Хальмг Таңһчин сойлын ачта көдләч Банана Ольга Манҗин Арслңла хамдан

Видео